பழநி முருகன் கோயிலுக்கு வழக்கறிஞர் பிரேமலதா குடும்பத்துடன் தரிசனம் செய்துவிட்டு திரும்பியபோது கோயில் தற்காலிக பாதுகாவலர், கோயில் அதிகாரிகள் வழக்கறிஞரை ஆபாசமாக பேசி தாக்கி காயம் ஏற்படுத்தியதாக பாதுகாவலர் உட்பட 4 பேர் மீது பழநி போலீசில் புகார் அளித்தார்.

அதன்படி போலீசார் பாதுகாவலரை கைதுசெய்தனர். மற்ற 3 பேர் விசாரணைக்கு பின் விடுவிக்கப்பட்டனர்.பாதுகாவலரை தாக்கிய பெண் வழக்கறிஞர், அவரின் சகோதரி மீது தற்காலிக பணியாளர்கள் பழநி போலீசில் புகார் செய்தனர். அதன்படி வழக்கறிஞர் பிரேமலதா மீதும் போலீசார் வழக்குப்பதிவு செய்தனர். இதனிடையே கோயில் பணியாளர்களிடம் பொய் புகார் வாங்கிக்கொண்டு பாதிக்கப்பட்ட பெண் வழக்கறிஞர், அவரின் சகோதரி மீது பதியப்பட்ட வழக்கை திரும்பபெற வேண்டும், பெண் வழக்கறிஞர் புகாரில் கூறி உள்ள மற்ற 3 பேரையும் கைது செய்யவேண்டும், தேவஸ்தான அதிகாரிகளுக்கு ஆதரவாக செயல்படும் போலீஸ் நடவடிக்கைக்கு கண்டனம் தெரிவித்து ஒருநாள் நீதிமன்றம் பணிப்புறக்கணிப்பு செய்ய பழநி வழக்கறிஞர்கள் சங்கத்தினர் வேண்டுகோள் விடுத்தனர்.

அதன்படி திண்டுக்கல் மாவட்டத்தில் உள்ள அனைத்து நீதிமன்றங்களிலும் வழக்கறிஞர்கள் நேற்று ஒருநாள் நீதிமன்றம் பணி புறக்கணிப்பில் ஈடுபட்டனர்.