ஈரோடு: ஈரோடு வ.உ.சி., பூங்காவில், மகாவீர ஆஞ்சநேயர் கோவிலில் அன்னதான திட்டம் துவங்கப்பட்டது.கடந்த அ.தி.மு.க., ஆட்சியில், அறநிலையத்துறை மூலம் கோவில்களில், ஏழை, எளிய மக்கள் மற்றும் தரிசனத்துக்கு வரும் பக்தர்களுக்கு உணவு வழங்கும் நோக்கில் அன்னதான திட்டம் துவங்கப்பட்டது. இத்திட்டத்துக்காக, தமிழக அரசு நிதி வழங்கியது. அன்னதான திட்டம் நடக்கும் கோவில்களில், அன்னதானத்துக்கான உண்டியல் வைத்தும், அரிசி உள்ளிட்ட பொருட்கள் வாங்கியும், 10, 25, 50 ரூபாய் நன்கொடை வழங்கலாம். ஒருநாள் மற்றும் ஆயுள் சந்தாவுக்கு பணம் செலுத்தி அன்னதான திட்டம் நடைபெற உதவலாம். இத்திட்டத்துக்கு செலுத்தும் பணத்துக்கு, வருமான வரி விலக்கு அளிக்கப்படுகிறது.ஈரோடு மாவட்டத்தில் பவானி சங்கமேஸ்வரர், சத்தியமங்கலம் பண்ணாரி அம்மன் கோவில், திண்டல் முருகன் கோவில், பெரியமாரியம்மன் கோவில் உள்பட13 கோவில்களில், ஏற்கனவே அன்னதான திட்டம் செயல்படுகிறது.நேற்று ஈரோடு வ.உசி., பார்க் மகாவீர ஆஞ்சநேயர் கோவில், கோபி செட்டிபாளையம் பச்சமலை சுப்பிரமணியர் கோவில் ஆகியவற்றில் அன்னதான திட்டம் துவங்கி வைக்கப்பட்டது.