ஈரோடு, சூரம்பட்டி பாரதிபுரத்தை சேர்ந்தவர் துரைசாமி, 42, பெயின்டர். திருமணமாகவில்லை. இவரது தந்தை ஆறுமுகம் கடந்த, 3ல் இறந்தார். துரைசாமிக்கு மது குடிக்கும் பழக்கம் இருந்தது. தந்தை இறப்பால் மன உளைச்சல் ஏற்பட்டு அதிகளவில் மது குடித்துள்ளார். நேற்று முன்தினம் மதியம் பேச்சு மூச்சின்றி வீட்டில் கிடந்துள்ளார். உறவினர்கள், நண்பர்கள் மூலம் அவரை ஈரோடு அரசு மருத்துவமனைக்கு கொண்டு சென்றனர். அவரை பரிசோதித்த டாக்டர்கள், ஏற்கனவே இறந்து விட்டதாக தெரிவித்தனர். அதன் பின் அவரது உடல், வீட்டுக்கு கொண்டு வந்து இறுதி சடங்கு செய்த பின், அங்குள்ள மயானத்துக்கு எடுத்து செல்லப்பட்டது. அப்போது துரைசாமி முதுகில் ரத்தக்கறை இருந்ததாக கூறி, சந்தேகம் எழுப்பி சூரம்பட்டி போலீசாருக்கு அப்பகுதியை சேர்ந்த நபர் ஒருவர் போன் மூலம் தகவல் தெரிவித்தார். போலீசார் விரைந்து சென்று, துரைசாமி உடலை கைப்பற்றி ஈரோடு அரசு மருத்துவமனை பிரேத பரிசோதனை அறைக்கு கொண்டு வந்தனர். இறந்தவர் உடலை மயானம் வரை எடுத்து சென்ற பின், மீண்டும் அரசு மருத்துவமனைக்கு பிரேத பரிசோதனைக்காக கொண்டு வந்தது பரபரப்பை ஏற்படுத்தியது. பிரேத பரிசோதனைக்கு பின்னரே, இறப்புக்கான முழு காரணம் தெரிய வரும் என, போலீசார் தெரிவித்தனர்.