சாம்பியன் பட்டம் வென்ற தேனி

ஈரோடு, நவ. 12-

பள்ளிக்கல்வித்துறை சார்பில் மாநில அளவிலான, 65-வது குடியரசு தின தடகள விளையாட்டு போட்டி, ஈரோடு வ.உ.சி., பூங்கா விளையாட்டு அரங்கில், கடந்த, 6ம் தேதி தொடங்கியது. முதற்கட்டமாக, 14 வயது 17 வயது, 19 வயதுக்கு உள்பட்ட மாணவிகளுக்கான போட்டி நடந்தது. மொத்தம், 43 பிரிவுகளில் நடந்த போட்டியில், 38 மாவட்டங்கள் மற்றும் தமிழ்நாடு விளையாட்டு மேம்பாட்டு ஆணைய விளையாட்டு விடுதியை சேர்ந்த, 2,518 மாணவிகள் பங்கேற்றனர். 8ம் தேதி முடிவடைந்த போட்டியில், கோவை மாவட்ட மாணவிகள் அணி, 54 புள்ளிகள் பெற்று ஒட்டுமொத்த சாம்பியன் பட்டத்தை வென்றது.

இதை தொடர்ந்து மாணவர் தடகளப்போட்டி, 9ம் தேதி தொடங்கியது. இதில், 2,710 வீரர்கள் பங்கு பெற்றனர். இவர்களுக்கும் மூன்று பிரிவுகளாக போட்டி நடந்தது. நேற்றுடன் போட்டிகள் நிறைவடைந்தன. இதில் தேனி மாவட்ட மாணவர்கள், 60 புள்ளிகள் பெற்று ஒட்டுமொத்த சாம்பியன் பட்டத்தை வென்றனர். கோவை மாவட்டம், 46 புள்ளிகள் பெற்று இரண்டாமிடம், 37 புள்ளிகள் பெற்று சேலம் மூன்றாமிடத்தை பிடித்தது. பள்ளிக்கல்வித்துறை சென்னை தலைமை உடற்கல்வி ஆய்வாளர் கோபாலகிருஷ்ணன் தலைமையில் பரிசளிப்பு விழா நடந்தது.