கள்ளக்குறிச்சி நகராட்சியில் கிரீன் வாரியர்ஸ் என்ற தனியார் நிறுவனம் மூலம் ஒப்பந்த அடிப்படையில் 130 துப்புரவு பணியாளர்கள் பணி புரிகின்றனர். இவர்களுக்கு கடந்த 2 மாதங்களாக சம்பளம் வழங்கப்படவில்லை.

நிலுவை சம்பளத்தை உடனடியாக வழங்கக்கோரியும், இனிவரும் காலங்களில் தாமதமின்றி சம்பளம் வழங்க வலியுறுத்தியும், 100க்கும் மேற்பட்ட துப்புரவு பணியாளர்கள், கள்ளக்குறிச்சி நான்கு முனை சந்திப்பில் நேற்று காலை 6:10 மணியளவில், பணி புறக்கணிப்பு செய்து ஆர்ப்பாட்டத்தில் ஈடுபட்டனர்.

நகராட்சி துப்புரவு ஆய்வாளர் சையத் காதர், ஆர்ப்பாட்டத்தில் ஈடுபட்டவர்களிடம் பேச்சுவார்த்தை நடத்தினார். அதில் அனைவருக்கும் உடனடியாக சம்பளம் வழங்க நடவடிக்கை எடுக்கப்படும் என கூறியதையடுத்து, துப்புரவு பணியாளர்கள் காலை 6:30 மணியளவில் போராட்டத்தை கைவிட்டு, பணிக்கு திரும்பினர்.