தியாகதுருகம் சுற்றுவட்டார கிராமங்களில் ஆண்டுதோறும் அக்., மாதத்தில் மானாவாரி பயிராக உளுந்து சாகுபடி செய்கின்றனர். வடகிழக்கு பருவமழை ஈரத்தைக் கொண்டு பயிர் செழித்து வளர்ந்து மகசூலை கொடுக்கிறது. பராமரிப்பது எளிது குறுகிய காலத்தில் அறுவடைக்கு தயாராகும். உளுந்துக்கு நல்ல விலை கிடைப்பதால் இதன் சாகுபடி அதிக பரப்பில் மேற்கொள்ளப்படுகிறது.

கடந்த 20 நாட்களுக்கு முன் பெய்த மழை ஈரம் கொண்டு உளுந்து விதைப்பு பணிகளை முடித்தனர். செடி வளரும் நிலையில் நேற்று முன்தினம் தியாகதுருகம் பகுதியில் ஒரு மணி நேரத்திற்கு மேலாக கன மழை பெய்தது.

இது உளுந்து பயிருக்கு ஊட்டத்தை கொடுத்து செழித்து வளர கை கொடுக்கும். தகுந்த தருணத்தில் மழை பெய்திருப்பது உளுந்து சாகுபடி செய்த விவசாயிகளை மகிழ்ச்சியடைய செய்துள்ளது.