சின்ன காஞ்சிபுரம் பச்சையப்பன் மகளிர் கல்லுாரி பின்புறம் உள்ள சாந்தாலீஸ்வரர் கோவில் தெருவில் உள்ள பாலகுஜாம்பாள் சமேத வசிஷ்டேஸ்வரர் கோவிலில் வரும் 24ல் பங்குனி உத்திர திருக்கல்யாண பெருவிழா நடைபெறுகிறது.

விழாவையொட்டி, காலை 5:00 மணிக்கு திருப்பள்ளி எழுச்சியும், தொடர்ந்து சிவபூஜை, சிவ கொடியேற்றுதல், திருவிளக்கு ஏற்றுதல் நடைபெறுகிறது. காலை 9:00 மணிக்கு திருவாசகமும், திருக்கோவையாரும், எம்பெருமானுக்கு அபிஷேக ஆராதனை நடைபெறுகிறது.

மாலை 6:00 மணிக்கு திருவாசகம் முற்றோதலும், 7:00 மணிக்கு பாலகுஜாம்பிகை சமேத வசிஷ்டேஸ்வரர் பெருமானுக்கும் திருக்கல்யாணமும், தொடர்ந்த ஊஞ்சல் உற்சவமும் நடைபெறுகிறது.

திருக்காலிமேடு சத்யநாதசுவாமி பிரமராம்பிகை கோவிலில் வரும் 24ல் காலை 10:00 மணிக்கு பங்குனி உத்திர திருக்கல்யாண உற்சவம் நடக்கிறது. காஞ்சிபுரம் சண்முகா நகர் விரிவு பகுதியில், கோகிலாம்பாள் சமேத கல்யாண சுந்தரேஸ்வரர் கோவிலில் பங்குனி உத்திர திருக்கல்யாண உற்சவத்தையொட்டி வரும் 24ல் காலை 10:00 மணிக்கு சிறப்பு மஹா அபிஷேகமும், மஹா தீபாராதனையும் நடக்கிறது.

மாலை 4:00 மணிக்கு விஜயகணபதி கோவிலில் இருந்து அம்பாள் அழைப்பும், மாலை 5:00 மணிக்கு திருக்கல்யாண உற்சவமும், இரவு 7:30 மணிக்கு சுவாமி, அம்பாள் வீதியுலா நடக்கிறது.