பூஜைக்கு தேவையான பொருட்கள் வாங்க வழக்கத்தைவிட நேற்று ரயில்வே சாலையில் பொதுமக்கள் கூட்டம் அதிகமாக காணப்பட்டது.

இந்நிலையில், ராஜாஜி மார்க்கெட் அருகில், பாதாள சாக்கடையில் அடைப்பு ஏற்பட்டு ‛மேன்ஹோல்' வழியாக வெளியேறிய கழிவுநீர், துர்நாற்றத்துடன் சாலையில் வழிந்தோடியது.

இதனால், இச்சாலையில் நடந்து சென்றவர்கள் கழிவுநீரில் நடந்து செல்ல வேண்டிய அவலநிலை ஏற்பட்டது. பூஜை பொருட்கள் விற்பனை செய்ய சாலையோரம் கடை வைத்திருந்த வியாபாரிகளும் சிரமத்திற்கு ஆளாகினர்.

வேகமாக சென்ற வாகனங்களால் கழிவுநீர் தெளித்ததால், பாதசாரிகள் மன உளைச்சலுக்கு ஆளாகினர். இப்பகுதியில், இரு நாட்களாக வெளியேறும் கழிவுநீரால் சுகாதார சீர்கேடு ஏற்படும் நிலை உள்ளது.

எனவே, பாதாள சாக்கடையில் ஏற்பட்ட அடைப்பை முழுதும் நீக்க மாநகராட்சி நிர்வாகம் நடவடிக்கை எடுக்க வேண்டும் என, கோரிக்கை எழுந்துள்ளது.