மேலும், மழைக்காலத்தில் இந்த ஏரி நிரம்பி வெளியேறும் உபரி நீர், நெல்வாய் மடுவு வழியாக மதுராந்தகம் ஏரிக்கும், காவனூர்புதுச்சேரி, கம்மாளம்பூண்டி அரசாணிமங்கலம் மற்றும் அத்தியூர் ஆகிய கிராம ஏரிகளுக்கு செல்கிறது.

உத்திரமேரூரில் இருந்து, 8 கி.மீ., தூரத்தில் உள்ள அனுமந்தண்டலம் - செய்யாற்று அணைக்கட்டு, உத்திரமேரூர் ஏரிக்கான முக்கிய நீர்வரத்து ஆதாரமாக உள்ளது. திருவண்ணாமலை மாவட்ட பகுதியில் சில நாட்களாக பெய்த மழை காரணமாக, தற்போது செய்யாற்றில் நீர்வரத்து துவங்கி உள்ளது. இதனால், அனுமந்தண்டலம் - செய்யாற்று அணைக்கட்டு மூலம் உத்திரமேரூர் ஏரிக்கான நீர்வரத்தும் துவங்கி உள்ளது.

இதுகுறித்து, உத்திரமேரூர் ஒன்றிய நீர்வளத்துறை உதவி பொறியாளர் கண்ணன் கூறியதாவது:

கடந்த ஆண்டுகளில் உத்திரமேரூர் ஏரிக்கான மதகுகள் சீரமைக்கப்பட்டு, கரைகள் பலப்படுத்துதல் உள்ளிட்ட பணிகள் மேற்கொள்ளப்பட்டன. இதனால், முழு கொள்ளளவுக்கான நீரை தேக்கி வைக்க ஏரி தயார் நிலையில் உள்ளது.

வடகிழக்கு பருவமழை தீவிரம் அடைவதற்கு முன்னதாகவே, தற்போது வரை பெய்துள்ள மழைக்கு ஏரியில் 65 சதவீதம் நீர் இருப்பு உள்ளது. அடுத்த சில நாட்களுக்கு மழை பெய்தால், விரைவில், உத்திரமேரூர் ஏரி நிரம்பும் என எதிர்பார்க்கப்படுகிறது.

இவ்வாறு அவர் கூறினார்.