தேர்தல் கமிஷன் உத்தரவின்படி, வாக்காளர் பட்டியல் சிறப்பு தீவிர திருத்தம், நவ., 4ம் தேதி துவங்கியது.

காஞ்சிபுரம் மாவட்டத் தில் உள்ள நான்கு சட்டசபை தொகுதிகளுக்கு உட்பட்ட பகுதிகளில், 14 லட்சத்து 1,198 வாக்காளர்களுக்கு, 1,401 ஓட்டுச்சாவடி நிலைய அலுவலர்கள், கடந்த, 14ம் தேதி வரை கணக்கெடுப்பு படிவத்தை வழங்கினர்.

பூர்த்தி செய்யப்பட்ட படிவத்தை திரும்ப பெற்று, கடந்த 19ம் தேதி வரைவு வாக்காளர் பட்டியல் வெளியிடப்பட்டது.

இதில், விசாரணையின் அடிப்படையில், கணக்கெடுப்பு படிவங்கள் வாக்காளர்களிடம் இருந்து பூர்த்தி செய்து வராத படிவங்கள், இறந்து போனவர்களாகவும் குடியிருப்பு பகுதியில் வசிக்காதவர்களாகவும், நிரந்தரமாக முகவரி மாற்றம் செய்தவர்களாகவும், இரட்டை பதிவு கொண்ட வாக்காளர்களாகவும் என, 2.74 லட்சம் பேர் இருந்தனர்.

இவர்களை வாக்காளர் பட்டியலில் இருந்து நீக்கப்பட்டு, மீதமுள்ள 11.26 லட்சம் வாக்காளர்கள் கொண்ட பட்டியல் வெளியிடப்பட்டது. இதைத் தொடர்ந்து, வாக்காளர் பட்டியலில் பெயர் சேர்க்க, வரும், ஜன., 18ம் தேதி வரை விண்ணப்பிக்கலாம் என, தேர்தல் ஆணையம் அறிவித்துள்ளது.

இந்நிலையில், எஸ்.ஐ.ஆர்., பணியின் போது, பூர்த்தி செய்யப்பட்ட படிவம் பெறப்பட்டவர்களில், 56,479 பேரின் விபரங்கள், கடந்த, 2002--- - 05ம் ஆண்டு பட்டியலுடன் பொருந்தவில்லை.

மேலும், பெறப்பட்ட விண்ணப்பங்களில் முன் உள்ள விபரங்கள் தவறாக உள்ளது.

இதையடுத்து, அவர்கள் அனைவருக்கும், மாவட்ட தேர்தல் அலுவலகம், தேர்தல் கமிஷன் அறிவுறுத்தி உள்ள, 13 ஆவணங்களில் ஒன்றை சம்பந்தப்பட்ட ஓட்டுச்சாவடி நிலைய அலுவலர்களிடம், வரும் ஜன., 18ம் தேதிக்குள் சமர்ப்பிக்க வேண்டும் என, 'நோட்டீஸ்' அனுப்பி உள்ளது.

தொகுதி வாக்காளர்கள் விபரம்

ஆலந்துார் 28,095

ஸ்ரீபெரும்புதுார் 16,297

உத்திரமேரூர் 5,320

காஞ்சிபுரம் 6,767

மொத்தம் 56,479