காஞ்சிபுரம் மாவட்டத்தில், தனியார் மற்றும் அரசு பள்ளிகள் என, மொத்தம், 106 மேல்நிலைப் பள்ளிகள் இயங்கி வருகின்றன. அதேபோல், 184 பள்ளிகளைச் சேர்ந்த 10ம் வகுப்பு மாணவ - மாணவியர் இந்தாண்டு அரசு பொதுத்தேர்வு எழுத உள்ளனர்.

பிளஸ் 2, பிளஸ் 1 வகுப்பு தேர்வுகளுக்கு தலா 54 மையங்களிலும், 10ம் வகுப்பு தேர்வுக்கு 66 மையங்கள் என, 120 தேர்வு மையங்களில் நடைபெற உள்ளன.

இதில், 42,585 மாணவ -- மாணவியர் பிளஸ் 2, பிளஸ் 1, மற்றும் 10ம் வகுப்பு அரசு பொதுத்தேர்வுகள் எழுத உள்ளனர். மார்ச் 1ல், பிளஸ் 2 தேர்வு துவங்கியது.

நேற்று பிளஸ் 1 அரசு பொதுத்தேர்வுக்கு, 54 தேர்வு மையங்களில், 6,734 மாணவர், 7,392 மாணவியர் என மொத்தம், 14,126 பேர் தேர்வு எழுத ஏற்பாடு செய்யப்பட்டிருந்தது.

இந்த தேர்வு மையங்களுக்கு, 54 முதன்மை காப்பாளர்கள், 54 துறை அலுவலர்கள், 5 கூடுதல்துறை அலுவலர்கள், 12 வழித்தட அலுவலர்கள், 100 பறக்கும் படை அலுவலர்கள், 800 அறை கண்காணிப்பாளர்கள், தேர்வில் சொல்வதை எழுதுவோர் 145 பேர் என, 1,170 பேர், பிளஸ் 1 பொதுத்தேர்வு கண்காணிக்கும் பணியில் ஈடுபட்டு வருகின்றனர்.

முதல்நாள் நேற்று தமிழ் தேர்வில், 141 பேர் தேர்வு எழுத வரவில்லை.