ஸ்ரீபெரும்புதுார் நகராட்சி அலுவலகம் அருகே, தேரடி பேருந்து நிறுத்தம் எதிரே உள்ள பிள்ளைமண்டபம் பகுதியில், 24ம் தேதி இரவு 11:00 மணிக்கு, தலையில் வெட்டுக்காயங்களுடன் கிடந்த ஆண் உடலை போலீசார் கைப்பற்றினர்.

விசாரணையில், இறந்தவர் சீர்காழி மாவட்டத்தைச் சேர்ந்த செல்லதுரை, 44, என்பதும், ஸ்ரீபெரும்புதுாரில் வாடகைக்கு தங்கி, சென்னை - பெங்களூரு தேசிய நெடுஞ்சாலையோரம், ஸ்ரீபெரும்புதுார் புதிதாக கட்டப்பட்டு வரும், டி-மார்டு வணிக கடையில் காவலாளியாக வேலை செய்து வந்ததும் போலீசார் விசாரணையில் தெரிந்தது.

இந்த நிலையில், ஸ்ரீபெரும்புதுார், சிவந்தாங்கல் பகுதியைச் சேர்ந்த கண்ணியப்பன், 28, என்பவரை, சந்தேகத்தின் பேரில், ஸ்ரீபெரும்புதுார் போலீசார் நேற்று கைது செய்து விசாரித்து வருகின்றனர்.