காஞ்சிபுரம், வாலாஜாபாத், குன்றத்துார், உத்திரமேரூர், ஸ்ரீபெரும்புதுார் ஆகிய ஐந்து தாலுகாக்களில், 1.50 லட்சம் ஏக்கர் விளை நிலங்கள் உள்ளன. இதில், சம்பா மற்றும் நவரை ஆகிய இரு பருவங்களிலும், ஒரு லட்சம் ஏக்கர் பரப்பளவில் நெல் சாகுபடி செய்யப்படுகிறது.

சொர்ணவாரி பருவத்தில் தண்ணீர் பற்றாக்குறை, கோடை வெயில் உள்ளிட்ட காரணங்களால், 30,000 ஏக்கர் பரப்பளவில் மட்டுமே விவசாயிகள் நெல் சாகுபடி செய்கின்றனர்.

ஒவ்வொரு பருவத்திற்கும் நெல் அறுவடை செய்யும் போது, நுகர்பொருள் வாணிப கழகத்தினர் நெல் கொள்முதல் நிலையங்களை துவக்குகின்றனர். இதன் வாயிலாக, கணிசமான நெல் கொள்முதல் செய்து, அரிசியாக மாற்றி கூட்டுறவு துறைக்கு கொடுத்து விடுகின்றனர்.

சம்பா மற்றும் நவரை பருவத்திற்கு மட்டும் கூடுதல் நெல் கொள்முதல் நிலையங்களை மாவட்டம் முழுதும் துவக்கப்படுகின்றன.

குறிப்பாக, நுகர்பொருள் வாணிப கழகத்தில் மட்டுமல்லாது, தேசிய நுகர்வோர் கூட்டமைப்பு குழுவினரும், நவரை பருவத்திற்கு நெல் கொள்முதல் நிலையங்களை துவக்கி, விவசாயிகளிடம் இருந்து நெல் கொள்முதல் செய்கின்றனர்.

அதன்படி, நுகர்பொருள் வாணிப கழகத்தின் கட்டுப்பாட்டில், 95 நெல் கொள்முதல் நிலையங்கள் மற்றும் தேசிய நுகர்வோர் கூட்டமைப்பு குழுவினர் கட்டுப்பாட்டில், 33 நெல் கொள்முதல் நிலையங்கள் என மொத்தம் 128 நெல் கொள்முதல் நிலையங்கள் துவக்கப்பட்டு நெல் கொள்முதல் செய்யும் பணி துவக்கப்பட்டு உள்ளது.

நேற்று முன் தினம் வரையில், 39,804 மெட்ரிக் டன் எடை நெல் கொள்முதல் செய்யப்பட்டு உள்ளது. கொள்முதல் செய்த நெல்லை, 9.95 லட்சம் நெல் மூட்டைகளாக பிடிக்கப்பட்டு உள்ளது.

தினசரி பிடிக்கப்படும் நெல் மூட்டைகளை, அடுத்த நாளில் நெல்கொள்முதல் நிலையங்களில் இருந்து, லாரிகளின் வாயிலாக லோடு ஏற்றி மொத்தமாக இருப்பு வைக்கும் இடத்தில் இறக்கப்படுகிறது. ஒரு சில நெல் கொள்முதல் நிலையங்களில் பிடிக்கப்படும் நெல் மூட்டைகளை நேரடியாக நெல் அரவை மில்லுக்கு அனுப்பி வைக்கப்படுகிறது.

ஒரு வாரமாக லோடு ஏற்றி செல்லும் லாரிகள் வேலை நிறுத்தப் போராட்டம் நடத்தி வருவதால், நெல் கொள்முதல் நிலையங்களில் நெல் மூட்டைகள் தேக்கமடைந்துள்ளன. கோடை மழை பெய்தால், நெல் மூட்டைகள் மழையில் நினைந்து நெல் முளைக்கும் அவலம் ஏற்பட்டுள்ளது.

இதை சரி செய்வதற்கு தேக்கம் இன்றி நுகர்பொருள் வாணிப கழக அதிகாரிகள் நெல் மூட்டைகளை லாரிகளில் ஏற்றி செல்ல வழி வகை செய்ய வேண்டும் என, கோரிக்கை எழுந்துள்ளது.

இதுகுறித்து, நுகர்பொருள் வாணிப கழக அதிகாரி ஒருவர் கூறியதாவது:

லாரி வேலை நிறுத்தப் போராட்டத்தால், கொள்முதல் செய்த நெல் மூட்டைகளை ஏற்றி செல்ல முடியவில்லை. நாளை முதல், நெல் கொள்முதல் நிலையங்களில் தேங்கியுள்ள நெல் மூட்டைகளை ஏற்றி செல்ல நடவடிக்கை எடுக்கப்படும்.

அதுவரையில், நெல் மூட்டைகளை பாதுகாப்பாக வைத்திருக்க அறிவுரை வழங்கப்பட்டு உள்ளது.

இவ்வாறு அவர் கூறினார்.