காஞ்சிபுரம் ஆலடி பிள்ளையார்கோவில் தெருவில் உள்ள பாலதர்ம சாஸ்தா கோவிலில் 8ம் ஆண்டு பிரதிஷ்டை தினம், திருக்கல்யாண உத்சவம் நேற்று காலை 8:30 மணிக்கு கொடியேற்றத்துடன் துவங்கியது.

இதில், பகவான் பாண்டுரங்கன், பன்னக சயனம் குருசாமி ஆகியோர் கொடிமரத்தில் கொடியேற்றினர். மாலை 5:00 மணிக்கு சித்தி, புத்தி சமேத கற்பக விநாயகர் திருக்கல்யாண வைபவமும், தொடர்ந்து சுவாமி வீதியுலாவும் நடந்தன.

இன்று, இரவு 7:00 மணிக்கு ஸ்ரீதேவி, பூதேவி சமேத ஸ்ரீநிவாச பெருமாள் திருக்கல்யாண உத்சவமும், நாளை, காலை 9:30 மணிக்கு புதிதாக செய்யப்பட்ட ஐம்பொன் வள்ளி, தெய்வானை சமேத முருகனுக்கு மஹா கும்பாபிஷேகம் நடக்கிறது.

மாலை 6:00 மணிக்கு வள்ளி, தெய்வானை சமேத முருகனுக்கு திருக்கல்யாண உத்சவமும் 10ம் தேதி மாலை 6:00 மணிக்கு மீனாட்சி சுந்தரேஸ்வரருக்கு திருக்கல்யாண உத்சவமும் நடக்கிறது.

விழா நிறைவாக வரும் 11ம் தேதி காலை 10:00 மணிக்கு பிரதிஷ்டை தினம், புத்திர மூலமந்திர ஹோமம், 1008 சஹஸ்ரநாமம், கலச புறப்பாடும் நடக்கிறது. இரவு 7:00 மணிக்கு பாலதர்ம சாஸ்தா வீதியுலா நடைபெறுகிறது.