தமிழகத்தில் சின்ன வெங்காயம் பெரம்பலுார், அரியலுார், நாமக்கல், தேனி மற்றும் திண்டுக்கல் மாவட்டங்களில் அதிகளவில் சாகுபடி செய்யப்படுகிறது. தற்போது, புதிய வெங்காயம் வரத்து, கரூர் உழவர் சந்தை மற்றும் காமராஜ் தினசரி மார்க்கெட்டுக்கு அதிகரிக்க தொடங்கியுள்ளதால், விலை குறைய தொடங்கியுள்ளது. இதனால், இல்லத்தரசிகள் மகிழ்ச்சியில் உள்ளனர்.

குறிப்பாக, சாதாரண ரகம் சின்ன வெங்காயம் கிலோ, 25 ரூபாய் முதல், 30 ரூபாய்க்கும், முதல் தர வெங்காயம், 35 ரூபாய்க்கும் விற்பனை செய்யப்படுகிறது. இந்தாண்டு தொடக்கத்தில், ஒரு கிலோ சின்ன வெங்காயம், 80 ரூபாய் வரை விற்பனையானது.

அதேபோல், கர்நாடகா மற்றும் மகாராஷ்டிரா மாநிலங்களில் இருந்து பெரிய வெங்காயம், வரத்து அதிகரிக்க தொடங்கியுள்ளது. இதனால் கிலோ பெரிய வெங்காயம், 45 ரூபாய் முதல், 50 ரூபாய் வரை விற்பனை செய்யப்படுகிறது. இந்தாண்டு தொடக்கத்தில் பெரிய வெங்காயம், 70 ரூபாய் வரை விற்பனையானது.

* தமிழகத்தில் செவ்வாழைபழம் ஈரோடு, திண்டுக்கல், தேனி, தஞ்சாவூர், திருச்சி, கரூர் உள்ளிட்ட மாவட்டங்களில் சாகுபடி செய்ய ப்படுகிறது. கரூருக்கு, செவ்வாழை பழம் வரத்து அதிகரிக்க தொடங்கியுள்ளது.

இதனால், உள்ளூர்களில் வேன் மூலம் செவ்வாழைபழம், அதிகளவில் விற்பனை செய்யப்படுகிறது. இந்தாண்டு தொடக்கத்தில், ஒரு செவ்வாழை பழம், 15 ரூபாய் வரை விற்றது. தற்போது, கரூர் மற்றும் சுற்று வட்டார பகுதிகளில், ஒரு செவ்வாழை பழம், ஐந்து ரூபாய் முதல், ஆறு ரூபாய் வரை விற்பனை செய்யப்படுகிறது. இதனால், பொதுமக்கள் அதிகளவில் செவ்வாழை பழத்தை வாங்கி செல்கின்றனர்.