இந்துக்களின் முக்கிய திருவிழாவான விநாயகர் சதுர்த்தி வரும், 27ல் நாடு முழுவதும் கொண்டாடப்படுகிறது. தமிழகத்தில் ஹிந்து முன்னணி சார்பில், விநாயகர் சதுர்த்தி விழாவை, வெகு விமர்சையாக கொண்டாட ஏற்பாடு நடந்து வருகிறது.

கரூர் மாவட்டத்தில், கரூர் டவுன், அரவக்குறிச்சி, குளித்தலை, கிருஷ்ணராயபுரம், வேலாயுதம்பாளையம், சின்னதாராபுரம், தோகைமலை உள்ளிட்ட பல்வேறு இடங்களில், 180 சிலைகள் ஹிந்து முன்னணி சார்பில் பிரதிஷ்டை செய்யப்பட உள்ளது.

இதுகுறித்து, கரூர் மாவட்ட ஹிந்து முன்னணி பொருளாளர் ரமேஷ் குமார் கூறியதாவது: வேலாயுதம் பாளையத்தில் சிலைகள் தயாரிக்கும் பணி விறுவிறுப்பாக நடந்து வருகிறது. வரும், 26 இரவு முதல் விநாயகர் சிலைகள் குறிப்பிட்ட இடங்களில் வைக்கப்பட்டு விடும். பிறகு, விசேஷ பூஜை நடத்தப்பட்டு, தொடர்ந்து மூன்று நாட்களில் காவிரி, அமராவதி ஆறுகளில் ஊர்வலமாக கொண்டு செல்லப்பட்டு, விநாயகர் சிலைகள் விசர்ஜனம் செய்யப்படும்.

இவ்வாறு, அவர் தெரிவித்தார்.