சிறுவர்களின் விபரீத விளையாட்டு

அயோத்தி - ராமேஸ்வரம் விரைவு ரயில், விழுப்புரம் - மயிலாடுதுறை அகலப்பாதையில் நேற்று வந்து கொண்டிருந்தது. மாலை, 4:45 மணிக்கு, கடலுார் மாவட்டம், பண்ருட்டி ரயில் நிலையத்தை கடந்து திருவதிகை ரயில்வே கிராசிங் அருகே சென்றபோது, சக்கரத்தில் வித்தியாசமான சத்தம் கேட்டது.உடன், லோகோ பைலட் திருவதிகை ரயில்வே கேட் முன் ரயிலை நிறுத்தி, ரயிலின் முன் சக்கரங்களை ஆய்வு செய்தார்.
அப்போது, 1 ரூபாய் நாணயங்களை சிறுவர்கள் தண்டவாளத்தில் நீண்ட வரிசையில் வைத்து சென்றதால், ரயில் சக்கரத்தில் நாணயம் நசுங்கி ஒட்டி கொண்டு, வித்தியாசமான சத்தம் ஏற்பட்டது தெரிய வந்தது.பட்டாம்பாக்கம் ரயில் நிலையத்தில் நிறுத்தி, சக்கரத்தில் ஒட்டியிருந்த 1 ரூபாய் நாணயங்களை அகற்றிய பின், 5:40 மணிக்கு ரயில் பட்டாம்பாக்கத்தில் இருந்து கடலுார் நோக்கி புறப்பட்டது. இதனால், அயோத்தி - ராமேஸ்வரம் விரைவு ரயில், 55 நிமிடங்கள் தாமதமாக சென்றது.