நாடு முழுவதும் வரும், 31ல் தீபாவளி பண்டிகை வெகுசிறப்பாக கொண்டாடப்பட உள்ளது. இதற்காக பொதுமக்கள் புத்தாடைகள், தங்க நகைகள் வாங்க தொடங்கியுள்ளனர். கரூரை பொறுத்தவரை ஜவஹர் பஜார், கோவை சாலையில் அதிகளவில் ஜவுளி நிறுவனங்கள், நகை கடைகள் உள்ளிட்ட பல்வேறு நிறுவனங்கள் உள்ளன.

வழக்கமாக தீபாவளி, பொங்கல் உள்ளிட்ட பண்டிகையின் போது, கரூர் ஜவஹர் பஜாரில் கண்காணிப்பு கோபுரங்கள் அமைக்கப்பட்டு, போலீசார் கூடுதல் பாதுகாப்பு பணியில் ஈடுபடுவர். ஆனால், தீபாவளி பண்டிகை நெருங்கும் நிலையில், கரூர் ஜவஹர் பஜாரில் விற்பனை சூடு பிடித்துள்ளது. ஆனால், கரூர் ஜவஹர் பஜாரில் உள்ள புறக்காவல் நிலையத்தில் போலீசார் பெரும்பாலும் பணியில் இருப்பது இல்லை. இதனால், கரூர் பஸ் ஸ்டாண்ட், ஜவஹர் பஜார், கோவை சாலை பகுதிகளில் ஏற்படும் கூட்ட நெரிசலை பயன்படுத்தி, பொதுமக்களிடம் இருந்து நகை மற்றும் பணத்தை, திருடர்கள் பறித்து செல்லும் அபாயம் ஏற்பட்டுள்ளது.

மேலும், கரூர் டவுன், வெங்கமேடு, தான்தோன்றிமலை மற்றும் பசுபதிபாளையம் போலீஸ் சரக பகுதிகளில் தொடர் திருட்டு சம்பவங்கள், கடந்த சில நாட்களாக நடந்து வருகிறது. குறிப்பாக, மக்கள் நெருக்கம் அதிகம் உள்ள பஸ் ஸ்டாண்ட் பகுதிகள், சேலம் பைபாஸ் சாலை, திருச்சி சாலை (காந்தி கிராமம்) பகுதிகளில் திருட்டு சம்பவங்கள் அதிகரித்து வருகின்றன. எனவே, தீபாவளி பண்டிகை நேரத்தில், திருட்டு சம்பவங்கள் மீண்டும் நடக்காமல் இருக்க, கரூர் ஜவஹர் பஜார் உள்ளிட்ட பகுதிகளில், கூடுதல் போலீசாரை பாதுகாப்புக்காக நியமிக்க வேண்டும் என, பொதுமக்கள் எதிர்பார்க்கின்றனர்.