நேற்று முன்தினம் இரவு வனப்பகுதியில் இருந்து வெளியேறிய ஒற்றை யானை, குருபரப்பள்ளி அருகே மணியாண்டஹள்ளி, விநாயகபுரம், ராகிமானப்பள்ளி பகுதியில் சுற்றித்திரிந்தது. அங்கிருந்து போடரஹள்ளிக்கு சென்ற யானை, ஒரு ஏக்கர் நெல் தோட்டம் மற்றும் வாழை மரங்கள், கரும்பு தோட்டத்தை சேதப்படுத்தியது. பின்னர், மார்க்கண்டேய நதி மற்றும் தென்பெண்ணை ஆறு சந்திக்கும் பகுதியிலுள்ள வனப்பகுதியில் தஞ்சமடைந்தது. அதை நேற்று மாலை விரட்டும் முயற்சியில் வனத்துறையினர் ஈடுபட்டனர்.