இது குறித்து, அவர் வெளியிட்டுள்ள அறிக்கை:

லோக்சபா பொதுத்தேர்தல் நடக்க உள்ளதையொட்டி கிருஷ்ணகிரி மாவட்ட கலெக்டர் அலுவலகத்தில் ஊடக சான்றளிப்பு மற்றும் கண்காணிப்பு மையம் அமைக்கப்பட்டு, உள்ளூர் தொலைக்காட்சி ஒளிப்பரப்புகள் பதிவு செய்யப்பட்டு வருகிறது. எனவே, கிருஷ்ணகிரி மாவட்டத்தில் ஊடக சான்றளிப்பு மற்றும் கண்காணிப்பு குழுவின் முன் அனுமதி பெற்ற பின்னரே அரசியல் கட்சி, வேட்பாளர்கள் தொடர்பான விளம்பரங்களை, உள்ளூர் தொலைக்காட்சிகளில் ஒளிப்பரப்ப வேண்டும்.

ஊடக சான்றளிப்பு குழுவினர், விளம்பரத்தை பார்வையிட்டு, ஆட்சேபனைகள் இருந்தால், அவற்றை நீக்கம் செய்து, வெளியிட அனுமதி அளிப்பர். செலவு விபரங்கள், செலவின உதவி பார்வையாளர் குழுவிற்கு அனுப்பப்பட்டு, வேட்பாளரின் செலவு கணக்கு பதிவேடுகளில் பதியப்படும். மேலும், அரசு கேபிள் நிறுவனத்தின் மூலம், ஒளிபரப்பாகி வரும், உள்ளூர் தொலைக்காட்சி நிறுவனங்களின் ஒளிபரப்பும் கண்காணிக்கப்படுகிறது. கண்காணிப்பு பணிகளில் ஈடுபடும் அலுவலர்கள் மற்றும் பணியாளர்கள் ஒளிபரப்பு விபரங்களை பதிவேடுகளிலும் பதிவு செய்து வருகின்றனர்.

இவ்வாறு, அவர் தெரிவித்துள்ளார்.