திருப்பரங்குன்றம் சுப்பிரமணிய சுவாமி கோயில் மூலஸ்தானத்தில் மூலவர் திருமண கோலத்தில் எழுந்தருளியுள்ளார். உள்ளூர், வெளியூர்களில் இருந்து தினமும் ஆயிரக்கணக்கான பக்தர்கள் சுவாமி தரிசனம் செய்ய வருகின்றனர். அருகிலுள்ள மாவட்டங்களில் இருந்து ஏராளமான பக்தர்கள் திருமணம் செய்து கொள்ள வருகின்றனர். பவுர்ணமி தினங்களில் ஆயிரக்கணக்கான பக்தர்கள் கிரிவலம் செல்கின்றனர். சுற்றுலா பயணிகளும் அதிகளவில் வருகின்றனர்.

இங்குள்ள மலைமேல் காசி விஸ்வநாதர் கோயில், சுனை தீர்த்தம் உள்ளது. காசி விசுவநாதரை தரிசனம் செய்வதற்கு முதியோர், மாற்றுத்திறனாளிகள் செல்ல முடியாத நிலை உள்ளது.

எனவே குன்றத்து மலைமேல் ரோப்கார் அமைக்க பல ஆண்டுகளாக பக்தர்கள் கோரிக்கை வைத்து வருகின்றனர். சட்டசபையில் ராஜன் செல்லப்பா எம்.எல்.ஏ., வும் பேசினார். திருப்பரங்குன்றத்தில் ரோப் கார் அமைப்பதற்காக முதல் கட்டமாக கடந்தாண்டு கோயிலுக்கு வரும் பக்தர்களிடம் கருத்து கேட்பு நடந்தது. இதில் அனைவருமே ரோப்கார் அவசியம் என தெரிவித்தனர்.

இரண்டாம் கட்டமாக 2023 ஆகஸ்டில் மலைக்குப் பின்புறம் மலை அடிவாரத்தில் ரோப் கார் அமைப்பதற்காக சென்னை ஐ.டி., காட் நிறுவனத்தினர் சர்வே பணிகளை மேற்கொண்டனர். தற்போது ரோப்கார் அமையவுள்ள இடம், உயரம், இரும்பு கம்பிகள், ரோப்கார் செல்லும் நேரம், திரும்பும் நேரம், இடத்தின் அளவு, ஆரம்பிக்கும் இடம், மலை மேல் இறங்கும் இடம் ஆகியவை குறித்து ஆய்வு மேற்கொள்ள, ஹரியானா ரயில் இந்தியா டெக்னிக்கல் அண்ட் எக்கனாமிக் சர்வீசஸ், ரோப்வே டிவிஷன் வாப்காப்ஸ், மும்பை இந்தியன் போர்ட் ரயில்வே அண்ட் ரோப்வே கார்ப்பரேஷன் ஆகிய நிறுவனங்கள் அடங்கிய குழுவை அறநிலையத்துறை அமைத்து உள்ளது.

அறங்காவலர் குழு தலைவர் சத்யபிரியா கூறுகையில், ரோப்கார் ஆய்வுக்காக குழு அமைத்துள்ளதும், அடுத்தடுத்த பணிகளுக்காக முதல்வர் உத்தரவிட்டிருப்பதும் மகிழ்ச்சி அளிக்கிறது. குழு அறிக்கை சமர்ப்பித்த பின்பு அடுத்த கட்ட நடவடிக்கை துவங்கும். இந்த ஆண்டு பல்வேறு கோயில்களுக்கு ரோப் கார் வர உள்ளது. விரைவில் திருப்பரங்குன்றத்திலும் அமையும். பக்தர்களின் பல ஆண்டு கோரிக்கை நிறைவேற உள்ளது என்றார்.