கலெக்டர் சங்கீதா தலைமையில் நடந்த கூட்டத்தில் டி.ஆர்.ஓ., சக்திவேல், வேளாண் இணை இயக்குநர் சுப்புராஜ், கூட்டுறவு மண்டல இணை இயக்குநர் குருமூர்த்தி, நீர்வளத்துறை செயற்பொறியாளர் அன்புச்செல்வன், கலெக்டரின் நேர்முக உதவியாளர் ராணி கலந்து கொண்டனர்.

கூட்டத்தில் நடந்த விவாதம்:

ராமச்சந்திரன், சொரிக்காம்பட்டி: திருமங்கலம் நீட்டிப்பு பிரதான கால்வாயின் 8, 9, 12 வது மடைகளில் உள்ள ஷட்டர்களை திருடியவர்கள் மீது நடவடிக்கை எடுக்க வேண்டும்.

அன்புச்செல்வன், செயற்பொறியாளர், நீர்வளத்துறை: கண்மாயின் வரத்து கால்வாயில் அனுமதி பெறாமல் வட்டார வளர்ச்சி அலுவலர் (பி.டி.ஓ.,) கட்டிய தடுப்பணையை அகற்ற திருமங்கலம் பி.டி.ஓ.,வுக்கு உதவி பொறியாளர் கடிதம் அனுப்பியுள்ளார். மடை திருட்டு குறித்து போலீசில் புகார் செய்யப்பட்டுள்ளது.

கலெக்டர்: நீர்வளத்துறை அனுமதியில்லாமல் எப்படி தடுப்பணை கட்டினீர்கள். பி.டி.ஓ., பதிலளிக்க வேண்டும்.

ராஜா, உறங்கான்பட்டி: பெரியகுளம் கண்மாய் வாய்க்காலை 12 வது கால்வாய் 45வது மடை வழியாக நெடுஞ்சாலை இடத்தில் நீர்வளத்துறையினர் வரைபடத்தை மாற்றி பாசனத்தை திசை திருப்பியுள்ளனர்.

சிவபிரபாகரன், செயற்பொறியாளர், மேலுார் பெரியாறு பிரதான கால்வாய்: பெரியகுளம் கண்மாய்க்கு 9வது கிளை வாய்க்கால் 13வது மடை மூலம் பாசன வசதி அளிக்க வழியில்லை. வரைபடத்தில் உள்ளவாறே பாசனம் நடைபெறுகிறது.

கலெக்டர்: வரைபடத்தை எப்படி மாற்ற முடியும். நீர்வளத்துறை கொடுத்ததும் நீங்கள் கொடுத்ததும் ஒரே மேப் தான்.

கோடீஸ்வரன், மேலுார்: அய்யாப்பட்டி ஊராட்சி ஒட்டக்கோவில்பட்டி கிழவன்குளத்தில் விவசாயத்திற்கு கண்மாய் தண்ணீர் திறக்காமல் தனிநபர்கள் மீன்வளர்க்கின்றனர்.

கலெக்டர்: மீன்வளத்துறை அனுமதி இல்லாமல் மீன்வளர்க்க முடியுமா. மீன்வளத்துறை அதிகாரி நேரில் சென்று ஆய்வு செய்து அறிக்கை சமர்ப்பிக்க வேண்டும்.

சந்திரன், கோவிலுார்: அலங்காநல்லுார் குட்டிமேய்க்கிபட்டி பெரிய இலந்தைகுளம் ஊராட்சியில் தரைக்கு மேல் குடிநீர் குழாய் பதித்துள்ளதால் வயலில் இயந்திர நெல் நடவு செய்யமுடியவில்லை. அறுவடை இயந்திரங்களை பயன்படுத்த முடியவில்லை.

பி.டி.ஓ., அலங்காநல்லுார்: குடிநீர் குழாய்களின் மீது இயந்திரம் மூலம் மண் மெத்தப்பட்டுள்ளது.

கலெக்டர்: அதெப்படி தரைக்கு மேலே குடிநீர் குழாய் பொருத்தமுடியும். நெடுஞ்சாலை துறை கொடுத்த ரூ.7 லட்சம் என்னவானது. தனியாக 'பவர் ரூம்' கட்டி கொடுத்துள்ளனர். பைப் லைனை ஏன் தரைக்கு மேலே அமைத்தீர்கள். உடனடியாக இப்பிரச்னையை சரிசெய்ய வேண்டும்.

முத்துமீரான், பேரையூர்: பேரையூர் விவசாயிகளுக்கு சிறுதானிய விதைகளை அதிகமாக வழங்க வேண்டும்.

சுப்புராஜ், வேளாண் இணை இயக்குநர்: விதைப்பண்ணை மூலம் கொள்முதல் செய்யப்படும் சான்று விதைகளையே விதைக்காக வழங்க முடியும். சிறுதானிய விதைப்பண்ணை அமைக்க விருப்பமுள்ள விவசாயிகள் வேளாண் உதவி இயக்குநர் அலுவலகத்தை அணுகலாம்.

ராமன், நடுமுதலைக்குளம்: கோச்சடையில் உள்ள அபார்ட்மென்ட்டின் 600 குடியிருப்புகளின் கழிவுநீரும் கோச்சடை கண்மாயில் கலப்பதால் தொற்றுநோய் பரவும் அபாயம் உள்ளது.

சேகரன், உதவி பொறியாளர்: நீர்வளத்துறை சார்பில் கண்மாய்க்கு வரும் கழிவுநீர் பாதையை இரண்டு முறை அடைத்து விட்டோம். மீண்டும் திறந்து கழிவுநீரை வெளியேற்றுகின்றனர்.

கலெக்டர்: நீர்வளத்துறை சார்பில் அபார்ட்மென்ட் மீது போலீசில் புகார் கொடுங்கள். பாதாள சாக்கடை திட்டம் சரியாக செயல்படுத்தாத அபார்ட்மென்ட் மீது மாநகராட்சி நடவடிக்கை எடுக்க வேண்டும். இதை உடனடியாக செயல்படுத்த வேண்டும்.

பழனி, மேல உரப்பனுார்: பயிர்க்கடன் திரும்ப செலுத்துவதை ஓராண்டாக நீட்டிக்க வேண்டும்.

குருமூர்த்தி, இணைப்பதிவாளர், கூட்டுறவுத்துறை: தற்போது தான் 6 மாதத்தில் இருந்து 9 மாதங்களாக நீட்டித்துள்ளோம். மீண்டும் உடனடியாக செயல்படுத்த முடியாது. மேலுாரில் இருபோக சாகுபடி நடைபெறுவதால் கடனை அடைத்த பின் பயிர்க்கடன் பெறலாம்.

மாரிச்சாமி, மாடக்குளம்: நிலையூர் கால்வாயில் இருந்து பாசனத்திற்கு தண்ணீர் திறக்காவிட்டால் சந்தோஷப்படுவோம். விளாச்சேரியில் இருந்து அவ்வளவு கழிவுநீரும் கால்வாயில் கலக்கிறது. மாடக்குளம் கண்மாய்க்கு ஏற்குடி அச்சம்பத்தில் இருந்து கால்வாய் வழியாக கழிவுநீர் கலக்கிறது. 2009 முதல் இப்பிரச்னையை கூறிவருகிறேன்.

கலெக்டர்: உங்கள் வேதனை புரிகிறது. போதுமான நிதிஆதாரம் இல்லாததால் சில திட்டங்களுக்காக காத்திருக்க வேண்டியுள்ளது. விரைவில் பிரச்னை சரிசெய்யப்படும்.

இவ்வாறு விவாதம் நடந்தது.