கோரிப்பாளையத்தைச் சேர்ந்தவர் ராமரத்தினம் 60. இவரது மனைவி மீனலோச்சனி 55. மகன், மகள் திருமணமாகி தனியாக வசிக்கின்றனர். பிளம்பரான ராமரத்தினம் அடிக்கடி மனைவியுடன் தகராறு செய்து வந்தார். கோபித்துக்கொண்டு மகன் வீட்டிற்கு மீனலோச்சனி அடிக்கடி செல்வதும், அவரை சமரசம் செய்து ராமரத்தினம் அழைத்து வருவதும் வழக்கம். ஆறு மாதங்களுக்கு முன் தன்னை அடித்ததாக தல்லாகுளம் மகளிர் போலீசில் மீனலோச்சனி புகார் கூற ராமரத்தினத்தை போலீசார் கண்டித்தனர்.

பத்து நாட்களுக்கு முன் கணவரால் தாக்கப்பட்டதில் கையில் எலும்புமுறிவு ஏற்பட்டு அரசு மருத்துவமனையில் மீனலோச்சனி சிகிச்சை பெற்றார். நேற்று முன்தினம் வீட்டில் அவர் வழுக்கி விழுந்து இறந்ததாக ராமரத்தினம் தெரிவித்தார். மகன், மகள் குடும்பத்துடன் வந்தனர். மீனலோச்சனி நெற்றியில் ஒரு ரூபாய் காசு வைத்து, உடைத்த தேங்காயை அருகில் வைத்து ராமரத்தினம் சோகத்துடன் இருந்தார்.

மீனலோச்சனியின் தலையை தொட்டு மருமகள் உமா மகேஸ்வரி அழுதபோது, பின்னந்தலையில் வெட்டுக்காயம் இருந்ததை பார்த்தார். ராமரத்தினத்திடம் கேட்டபோது, 'சாப்பாடு போடும் போது தலை கதவில் முட்டி ரத்தம் வந்தது. எழுப்பியும் அவள் எழுந்திருக்கவில்லை' என்றார். இறப்பில் சந்தேகம் இருப்பதாக மகன் பிரபாகரன் தல்லாகுளம் போலீசில் புகார் செய்தார். சந்தேக மரணமாக வழக்குப்பதிவு செய்யப்பட்டது. பிரேத பரிசோதனையில், தலையில் வெட்டியதால் இறந்தது உறுதியானது.

கொலையை மறைக்க மனைவி வழுக்கி விழுந்தது போல் 'செட்டப்' செய்து ராமரத்தினம் நாடகமாடியதும் தெரிந்தது. கொலை வழக்காக மாற்றி அவரை எஸ்.ஐ., அதிகுந்தகண்ணன் கைது செய்தார்.