மதுரையில் நடந்த ஆலோசனை கூட்டத்திற்கு, மண்டல பொது மேலாளர் சரத் ஸ்ரீ வஸ்தவா தலைமை வகித்தார். இதில், திருச்சி, மதுரை, தேனி, ராமநாதபுரம், சிவகங்கை, விருதுநகர், தென்காசி மாவட்டங்களில் இருந்து எம்.பி.,க்கள் பல்வேறு கோரிக்கைகளை முன்வைத்தனர்.

தேனி அ.தி.மு.க., - எம்.பி., ரவீந்திரநாத், ''சென்னை - போடி வாரம் 3 நாட்கள் இயக்கப்பட்டு வரும் ரயிலை தினசரி இயக்க கோரிக்கை வைத்துள்ளேன்,'' என்றார்.

ராஜ்யசபா ம.தி.மு.க., - எம்.பி., வைகோ, ''மதுரை - கோவை இடையே அகலப்பாதை கொண்டு வந்து ஐந்தாண்டுகளாகி விட்டது. இதற்காக, 750 கோடி ரூபாய் செலவிடப்பட்டது. இதில் ஒரே ஒரு ரயில் மட்டுமே இயக்கப்படுகிறது. ராமேஸ்வரம் - செங்கோட்டையில் இருந்து கோவைக்கு கூடுதல் ரயில்கள் இயக்க வேண்டும். மதுரை - பெங்களூரு இடையே வந்தே பாரத் ரயில் இயக்கப்பட வேண்டும்,'' என்றார்.

ராஜ்யசபா அ.தி.மு.க., - எம்.பி., தர்மர், 'ராமேஸ்வரத்திற்கு, வடமாநில பக்தர்கள் ஏராளமானோர் வருகின்றனர். இதனால் கூடுதல் ரயில் இயக்க வேண்டும். வந்தே பாரத் ரயில் இயக்க வேண்டும்,'' என்றார்.