தமிழக அரசு போக்குவரத்து கழக பஸ்களில் மாணவர்கள், மகளிர், மாற்றுத்திறனாளிகள், பணிநிமித்தமாக 'வாரன்ட்' வைத்துள்ள போலீசார், எம்.எல்.ஏ.,க்கள் என பல தரப்பினரும், இலவச பயணம் செய்ய அனுமதிக்கப்படுகின்றனர்.

கடந்த ஏப்., 24ல், தேனி மாவட்டம் கம்பத்தில் இருந்து திருச்சிக்கு, குளிர் சாதன வசதி அரசு பஸ் சென்றது.

இந்த பஸ்சில் திண்டுக்கல் மாவட்டம் நிலக்கோட்டை தொகுதி முன்னாள் அ.தி.மு.க., - எம்.எல்.ஏ.,வும், தற்போதைய, பா.ஜ., பிரமுகருமான அன்பழகன் ஏறினார்.

அன்பழகனிடம் கண்டக்டர் அபிமன்னன் டிக்கெட் கேட்டார். அதற்கு அன்பழகன், 'நான் முன்னாள் எம்.எல்.ஏ.,' என்றார். 'குளிர்சாதன அரசு பஸ்களில் முன்னாள் எம்.எல்.ஏ., பாஸ்களுக்கு அனுமதியில்லை' என கண்டக்டர் தெரிவித்தார்.

இதில் இருவருக்கும் வாக்குவாதம் ஏற்பட்டது. வேறு வழியின்றி அன்பழகன் பணம் கொடுத்து டிக்கெட் பெற்றார்.

இதற்கிடையே பஸ்சில் முக்கிய பிரமுகரிடம் வாக்குவாதம் செய்ததாக கூறி, கண்டக்டர் அபிமன்னனை சஸ்பெண்ட் செய்தது போக்குவரத்துக்கழக நிர்வாகம்.

இதுகுறித்து ஊழியர்கள் கூறுகையில், 'குளிர்சாதன வசதியுள்ள அரசு பஸ்சில் 'இலவச பாஸ் வைத்திருப்பவர்கள் பயணிக்க அனுமதியில்லை' என்று ஸ்டிக்கர் ஒட்டப்பட்டு உள்ளது. எனினும், முன்னாள் எம்.எல்.ஏ.,வை அனுமதிக்காததால், கண்டக்டர் சஸ்பெண்ட் செய்யப்பட்டுள்ளார்' என்றனர்.

இதுகுறித்து அரசு போக்குவரத்து கழக அதிகாரிகள் கூறும் போது, 'முன்னாள் எம்.எல்.ஏ.,க்கள் குளிர்சாதன வசதி பஸ்சில் இலவச பயணம் செய்ய பாஸ் உள்ளது. அதை அறியாமல், அந்த கண்டக்டர் அவரிடம் வாக்குவாதம் செய்ததால், சஸ்பெண்ட் செய்யப்பட்டுள்ளார்' என்றனர்.

முன்னாள் எம்.எல்.ஏ., பயணம், கண்டக்டர் சஸ்பெண்ட் போன்றவை முன்னரே நடந்துள்ளது. எனினும், இப்போது தான் இந்த விவகாரம் வெளியே வந்துள்ளது.