சின்ன இலந்தைகுளம் முத்துவேல் கூறியதாவது: இப்பகுதியில் உள்ள பழமையான பாசன வாய்க்கால்கள் துார்ந்து போய்விட்டன. ஓடைகளும் துார் வாரப்படாமல் செடி, கொடிகள் மண்டிக் கிடக்கின்றன. அடுத்தடுத்துள்ள வயல்கள் வழியாகத்தான் மழை நீர் வடிந்து செல்கிறது.

வாடிப்பட்டி முதல் தாமரைப்பட்டி வரையிலான 'அவுட்டர் ரிங் ரோடு' பணிகள் 3 ஆண்டுகளுக்கு மேலாக நடக்கிறது. இந்த ரோடு பகுதியைக் கடக்க முடியாமல் மழை நீர் வயல்களில் தேங்குகிறது. தண்ணீர் வெளியேற சாலையின் நடுவே ஒரேயொரு இடத்தில் மட்டுமே வடிகால் உள்ளது. இதனால் மழைநீர் வெளியேறிச் செல்ல முடியவில்லை. அறுவடைக்கு தயாராக இருந்த பயிர்கள் பெரும் நட்டம்தான் என்றார்.