மதுரை பைபாஸ் ரோடு காளவாசல் சந்திப்பில் உள்ள பாலத்தின் கிழக்கு பகுதி மின்கம்பங்களில் உள்ள விளக்குகள் ஒன்றுகூட எரியவில்லை. இதனால் பாலத்திலும். அதன் கீழ் பகுதியிலும் இரவு நேர போக்குவரத்துக்கு சிரமமாக உள்ளது. சம்பந்தப்பட்ட அதிகாரிகள் நடவடிக்கை எடுக்க வேண்டும்.

-ராஜரத்தினம், சந்திரகாந்தா நகர்

சேதமடைந்த நிழற்குடை

தேனி மெயின் ரோட்டில் ஆலம்பட்டி பஸ்ஸ்டாப்பில் இடியும் தருவாயில் பயணிகள் நிழற்குடை உள்ளது. பயணிகள் வெயிலில் நிற்கும் நிலை ஏற்பட்டுள்ளது. சேதமடைந்த நிழற்குடையை அகற்றி புதிதாக கட்டப்பட வேண்டும்.

- வெள்ளைச்சாமி, ஆலம்பட்டி.

வாய்க்காலில் கழிவுநீர்

மதுரை பைபாஸ் ரோடு நமச்சிவாய நகர் பகுதியில் 6 மாதங்களாக பாதாள சாக்கடை குழாயில் அடைப்பு ஏற்பட்டு மழைநீர் வாய்காலில் கழிவுநீர் தேங்கி நிற்கிறது. இதனால் தொற்றுநோய் அபாயம் உள்ளது.

- ஷாம், நமச்சிவாய நகர் மதுரை,

குண்டு குழி ரோடு

மதுரை மேலஆவணி மூலவீதி ரோடுமுழுவதும் பெரிய பள்ளங்கள் உள்ளன. டூவீலரில் செல்வோர் அடிக்கடி விபத்தில் சிக்கும் அபாயம் ஏற்பட்டுள்ளது. ரோட்டை சரிசெய்ய வேண்டும்.

-நாகராஜா, சிம்மக்கல்.

வீடுகளுக்கு முன் கழிவுநீர்

மதுரை புதுார் டி.ஆர்.ஓ., காலனி வயல்காட்டுதெருவில் வீடுகளுக்கு முன் கழிவுநீர் ஓடுகிறது. புகார் அளித்தும் பயன் இல்லை. கொசுக்கள் உற்பத்தியாகி தொற்று நோய் அபாயத்தில் இப்பகுதி மக்கள் உள்ளனர்.

- மந்தையன், டி.ஆர்.ஓ. காலனி.

ரோட்டில் கழிவுநீர்

மதுரை சிம்மக்கல் பஸ் ஸ்டாப் அருகே சாக்கடை நிரம்பி பல நாட்களாக கழிவுநீர் ரோட்டில் ஒடுகிறது. இப்பகுதியில் கொசுக்கள் உற்பத்தியாகி தொற்றுநோய் அபாயத்தில் உள்ளோம். மாநகராட்சியினர் நடவடிக்கை எடுக்க வேண்டும்.

-ரிஷி, சிம்மக்கல், மதுரை.

மயானத்தில் ஆபத்து

மதுரை தத்தனேரி மயானத்தில் இறந்தவர்களை பதிவு செய்யும் அலுவலகத்தில் டைல்ஸ் கற்கள் உடைந்துள்ளது. அங்கே பதிவு செய்ய செல்வோர்தடுமாறி விழும் நிலை ஏற்படுகிறது. சரிசெய்ய நடவடிக்கை வேண்டும்.

- சங்கரபாண்டியன், செல்லுார், மதுரை.

தெரு நாய்களால் அச்சம்

மதுரை திருநகர் அண்ணாதுரை பூங்கா அருகில் பத்துக்கும் மேற்பட்ட நாய்கள் சுற்றி வருகின்றன. நடைப்பயற்சி செய்வோர் கடித்து விடுமோ என்ற அச்சத்தில் உள்ளனர். மாநகராட்சி நடவடிக்கை எடுக்க வேண்டும்.

- தினகரன், திருநகர்.

சங்கமமாகும் கழிவுகள்

மதுரை நெல்பேட்டை ஆல்பர்ட் விக்டர் மேம்பாலம் அருகே பாதாள சாக்கடை கழிவுகள், மீன், இறைச்சிக்கழிவுகளும், சங்கமமாகிறது. போக்குவரத்து நெரிசலை குறைக்க அமைக்கப்பட்ட பாதை தொற்றுநோயை உருவாக்குவது போல் உள்ளது. நடவடிக்கை தேவை.

- ஸ்ரீதர்பாபு, மதுரை.

கால்வாயில் குப்பை

மதுரை இஸ்மாயில்புரம் காயிதேமில்லத் நகர் 1வது தெரு வழியாக செல்லும் பனையூர் கால்வாய் முழுவதும் பிளாஸ்டிக் குப்பை நிறைந்துள்ளது. கொசுக்கள் உற்பத்தி அதிகரித்து நோய் பரப்புகிறது. குப்பையை அகற்ற வேண்டும்.

- அப்துல், நெல்பேட்டை.

உயரமான வேகதடையால் விபத்து

சோழவந்தான் தென்கரை பகுதி புதிய ரோட்டில் அதிக உயரத்தில் வேகத்தடை அமைத்துள்ளனர். இது பெரும் சுவர் போல் எழுப்பப்பட்டுள்ளதால் அடிக்கடி விபத்துகள் நடக்கிறது. அதனை சீராக அமைக்கப்பட வேண்டும்.

- ஆதித்ய ரூபன், தென்கரை.

சிக்னல் அமைக்க வேண்டும்

மதுரை - சிவகங்கை ரோட்டில் பள்ளிகள் அதிகம் உள்ளது. இந்த ரோட்டில் வாகனங்கள் அதிவேகமாக செல்கின்றன. பள்ளி வாகனங்கள், மாணவர்கள் பாதுகாப்பாக சாலையை கடக்க இப்பகுதியில் சிக்னல் அமைக்க வேண்டும்.

-மலைக்கண்ணன், மேலமடை.

மின்கம்பம் ஆக்கிரமிப்பு

மதுரை செல்லுார் மீனாட்சிபுரம் குலமங்கலம் சாலையில் புதியதாக ரோடு அமைக்கப்பட்டது. ரோட்டின் நடுவே மின்கம்பங்கள் உள்ளதால் வாகனங்கள் செல்ல தடையாக உள்ளது.

-சத்தியமூர்த்தி, எஸ். ஆலங்குளம்.