மதுரை மாநகராட்சி கமிஷனராக தினேஷ்குமார் இருந்தபோது வரி வசூல் தொடர்பாக ஆய்வு நடத்தினார். 2022 மற்றும் 2023 ல் விதிகளை மீறி வரியை குறைத்து நிர்ணயித்து ரூ.150 கோடி வருவாய் இழப்பு ஏற்படுத்தியது தெரியவந்தது. முறைகேடு குறித்து மத்திய குற்றப்பிரிவு மற்றும் சைபர் கிரைம் போலீசார் விசாரிக்கின்றனர்.

மாநகராட்சி உதவி வருவாய் அலுவலர் செந்தில்குமரன், ஓய்வுபெற்ற உதவி கமிஷனர் ரங்கராஜன், ஒப்பந்த ஊழியர்கள் தனசேகரன், சதீஷ், கார்த்திகேயன், இடைத்தரகர்கள் ஷாகா உசேன், ராஜேஷ் குமார், முகமது நுார் கைது செய்யப்பட்டனர்.

கைதான ஷாகா உசேன், ராஜேஷ் குமார், முகமது நுார், சதீஷ், ரங்கராஜன் ஜாமின் அனுமதிக்கக் கோரி மதுரை முதன்மை அமர்வு நீதிமன்றத்தில் மனு செய்தனர்.

நீதிபதி சிவகடாட்சம் விசாரித்தார். தலைமை குற்றவியல் வழக்கறிஞர் பழனிச்சாமி, 'வழக்கு ஆவணங்களை பரிசீலிக்க அவகாசம் தேவை,' என்றார். நீதிபதி ஜூலை 15க்கு ஒத்திவைத்தார்.