வரும் சட்டசபை தேர்தலில் தி.மு.க., கூட்டணி, அ.தி.மு.க., - பா.ஜ., கூட்டணி, நாம் தமிழர், த.வெ.க., என நான்கு முனைப்போட்டி ஏற்பட வாய்ப்புள்ளது. கரூர் விவகாரத்திற்கு பிறகு த.வெ.க.,வை தங்கள் கூட்டணியில் சேர்க்க அ.தி.மு.க.,வும், பா.ஜ.,வும் மறைமுகமாக அழைப்பு விடுத்து வருகின்றன. பழனிசாமியின் பிரசார பயணத்தில் த.வெ.க., கொடியுடன் அக்கட்சி தொண்டர்கள் சிலர் பங்கேற்றனர். சட்டசபை எதிர்க்கட்சி துணைத்தலைவரான உதயகுமார், 'ஆந்திராவில் பவன் கல்யாண் போல் நல்ல முடிவை எடுக்க வேண்டும்' என விஜய்க்கு 'அட்வைஸ்' செய்தார்.

அ.தி.மு.க., - பா.ஜ., கூட்டணியில் த.வெ.க., சேருமா அல்லது த.வெ.க., தலைமையில் புதிய கூட்டணி அமையுமா என விவாதம் நடக்கும் நிலையில், நேற்றுமுன்தினம் மதுரை பொதுக்கூட்டத்தில் பேசிய அ.தி.மு.க., முன்னாள் அமைச்சர் செல்லுார் ராஜூ, 'கூட்டணிக்கு அ.தி.மு.க., அலைந்ததாக வரலாறே கிடையாது. எந்த நேரத்திலும், எந்த சூழ்நிலையிலும் யாரையும் வம்பாக கூட்டணிக்கு அழைத்தது இல்லை.

எங்களுக்கு துணையாக தமிழக மக்களை காப்பாற்ற யார் துணை வந்தாலும் அவர்களை துாக்கி கொண்டாடுவோம். பிற கட்சிகளுக்கு எம்.ஜி.ஆர், ஜெயலலிதாவை பார்த்து அரசியல் செய்ய தெரியவில்லை. தமிழகமே இவர்களால் தான் கேட்டுப் போய்விட்டது'' என்றார்.

'விஜயைதான் மறைமுகமாக காய்ச்சி எடுக்கிறார்' என தொண்டர்கள் கருதினர். இந்நிலையில் நேற்று பேட்டியளித்த செல்லுார் ராஜூ, 'தேர்தலில் தி.மு.க.,விற்கு சரியான பதிலை ஒரு விரல் புரட்சி மூலமாக மக்கள் கொடுக்க வேண்டும்' என்றார். விஜய் நடித்த 'சர்க்கார்' படத்தில் ஒருவிரல் புரட்சி பாடல் இடம்பெற்றுள்ளது.

'தி.மு.க.,விற்கு எதிராக சொல்ல எத்தனையோ வார்த்தைகள் இருக்கும்போது விஜயின் 'ஒருவிரல் புரட்சி' என்ற வரியை செல்லுார் ராஜூ சொல்ல வேண்டிய அவசியம் ஏன். இதன்மூலம் அவரும் அ.தி.மு.க., கூட்டணியில் சேர விஜய்க்கு அழைப்பு விடுத்துள்ளார் என்றே கணிக்க முடிகிறது' என்கின்றனர் த.வெ.க.,வினர்.