உசிலம்பட்டி பகுதி கண்மாய்களான கருக்கட்டான்பட்டி, உசிலம்பட்டி, மாதரை, நல்லுத்தேவன்பட்டி, வகுரணி, புத்துார், வாலாந்துார் கண்மாய்களுக்கான நீராதாரமாக உள்ளது அசுவமாநதி.

இந்தாண்டு தொடர் மழையால் அசுவமாநதி தடுப்பணை நிரம்பி தொடர்ந்து 3 நாளாக நீர்வரத்து ஏற்பட்டுள்ளது. இதனால் கருக்கட்டான்பட்டி, மாதரை, நல்லுத்தேவன்பட்டி கண்மாய்களின் நீர்மட்டம் கணிசமாக நிரம்பிவருகிறது.

முத்துப்பாண்டிபட்டியில் இருந்து மலையடிவாரத்தில் சடையாண்டிபட்டி, கிருஷ்ணாபுரம், அம்பாசமுத்திரம்புதுார், இடையபட்டி வழியாக தொட்டப்பநாயக்கனுார் செல்லும் ரோடு புதிதாக அமைக்கப்படுகிறது.

முத்துப்பாண்டிபட்டி ராஜேந்திரன் கூறியதாவது: கிராமத்தினர் தோட்டங்களுக்குச் செல்ல இந்த சடையாண்டிபட்டி இணைப்பு ரோடு அமைக்கப்படுகிறது.

இதில் அசுவமாநதி குறுக்கிடும் பகுதியில் பாலம் அமைக்காததால் மழைக்காலம் இந்த ரோட்டை பயன்படுத்த முடியாத நிலை ஏற்பட்டுள்ளது. பாலம் அமைக்க அதிகாரிகள் முன்வரவேண்டும் என்றார்.