பள்ளிப்பாளையம்:பள்ளிப்பாளையம் அருகே, ஓடப்பள்ளி பகுதியில் காவிரி ஆற்றின் குறுக்கே தடுப்பணை உள்ளது. இந்த தடுப்பணை நீர்தேக்க பகுதியில், 10 கி.மீ., துாரத்திற்கு தண்ணீர் தேக்கி வைக்கப்படும். இந்த தண்ணீரில் மின் உற்பத்தி நடக்கும். மேலும், ஓடப்பள்ளி தடுப்பணை நீர் தேக்கத்தில் இருந்து தண்ணீர் எடுத்து சுத்திகரிப்பு செய்து, மாவட்டத்தின் பல பகுதிகளுக்கு குடிநீர் வழங்கப்பட்டு வருகிறது. ஓடப்பள்ளி தடுப்பணை நீர்தேக்கத்தில் குடிநீருக்கு மட்டும் தண்ணீர் தேக்கி வைக்கப்பட்டுள்ளது. அந்த தண்ணீரும் தற்போது குறைந்து வருகிறது. இதனால் நீர்தேக்க பகுதியில் தண்ணீரில் மூழ்கியிருந்த பாறைகள் வெளியே தெரிகின்றன. இதனால் குடிநீர் பற்றாக்குறை ஏற்படும் அபாயம் ஏற்பட்டுள்ளது.