டவுன் பஞ்சாயத்தில் குப்பை சேகரிக்க, 80 தூய்மை பணியாளர்கள் உள்ளனர். தினசரி 10 டன் குப்பை சேகரிக்கப்படுகிறது. பொதுமக்கள் மற்றும் வணிக நிறுவனங்கள் குப்பையை தரம் பிரிக்காமல் கொடுப்பதால் மக்கும் குப்பை, மக்காத குப்பை என தூய்மை பணியாளர்கள் தரம் பிரித்து, கொண்டு செல்வது மிகவும் காலதாமதம் ஆகிறது. அதனால் குப்பையை வாங்கும், போது வீடு, வணிக நிறுவனத்தினர், அவர்களே, கண்ணாடி, பிளாஸ்டிக்பொருட்கள், பாலித்தீன் பை, உணவு கழிவு என தரம் பிரித்து கொடுக்க வேண்டும் என ப.வேலுார் டவுன் பஞ்சாயத்து நிர்வாகம் அறிவித்துள்ளது.

இதுகுறித்து டவுன் பஞ்சாயத்து செயல்அலுவலர் திருநாவுக்கரசு கூறியதாவது, குப்பையை சேகரிக்கும் போது தரம் பிரித்து வாங்க வேண்டும் என தூய்மை பணியாளர்களுக்கு அறிவுறுத்தப்பட்டுள்ளது. அதேபோல் பொதுமக்களும் தரம் பிரித்து கொடுத்தால் மட்டுமே தூய்மை பணியாளர்கள் இன்று முதல் குப்பையை வாங்குவர். மக்கும் குப்பை, மக்காத குப்பை என தரம் பிரிக்காமல் கொடுத்தால் வாங்கப்பட மாட்டாது எனவும், பொதுமக்கள் இதற்கு ஒத்துழைப்பு வழங்க வேண்டும்.இவ்வாறு அவர் கூறினார்.