ஊட்டியில் நுகர்வோர் காலாண்டு கூட்டம், அரசு போக்குவரத்து கழக அலுவலகத்தில் நடந்தது. கூட்டத்திற்கு, நீலகிரி மண்டல பொது மேலாளர் முரளி தலைமை வகித்தார்.

நுகர்வோர் சார்பில், சிவசுப்ரமணியம் மற்றும் நிர்வாகிகள் பங்கேற்று பேசுகையில், 'கோத்தகிரி- மைசூர் பஸ் குன்னுார் செல்லாமல் ஊட்டி வந்து செல்ல வேண்டும்; நடத்துனர்கள் சிலர் சில்லறை தராமல் அலைகழிக்கும் போக்கு உள்ளதை தடுக்க வேண்டும்; மஞ்சூர், பந்தலுார் பகுதிகளுக்கு நேர காப்பாளர் நியமிக்க வேண்டும்; ஊட்டி - பெங்களூரு பஸ்சில் மூட்டை பூச்சி தொலையை கட்டுப்படுத்த வேண்டும்,' என்றனர்.

பொதுமேலாளர் முரளி பேசுகையில், '' கடந்த, 14 ஆண்டுகளுக்கு மேலான பஸ்சை இயக்க இயலாது. அதற்கு பதில் புதிய பஸ்கள் பெறப்படுகிறது. 7 ஆண்டு கடந்த பஸ்களுக்கு புது பாடி கட்டப்பட்டு இயக்கபடுகிறது. 30 சிறிய பஸ்களில், 14 பஸ்கள் புதுப்பிக்கப்பட்டு உள்ளது. பெங்களூரு பஸ்சில் உள்ள குறைபாடுகள் தீர்க்கப்படும்,'' என்றார்.