லோக்சபாவில் மலை மாவட்டத்தில் ஊட்டி, குன்னுார், கூடலுார் ஆகிய மூன்று தொகுதிகள் உள்ளன.

இங்கு, 5.73 லட்சம் வாக்காளர்கள் இடம் பெற்றுள்ளனர். நேற்று, லோக்சபா தேர்தலுக்கான ஓட்டுப்பதிவு நடந்தது. காலை, 7:00 மணிக்கு ஓட்டுப்பதிவு துவங்கியது.

நண்பகல், 12:00 மணி வரை, விறுவிறுப்பாக ஓட்டுப்பதிவு நடந்தது. சமீப காலமாக காலநிலை மாற்றத்தின் எதிரொலியாக, நேற்று, ஊட்டியில் அதிகபட்சம், 24, குறைந்தபட்சம், 14; குன்னுார் அதிகபட்சம், 27, குறைந்த பட்சம், 18; கூடலுார், அதிகபட்சம், 30, குறைந்த பட்சம், 18 டிகிரி செல்சியஸ் வெப்பம் நிலை நிலவியது. சுட்டெரிக்கும் வெயிலுக்கு ஓட்டு போட குறைந்தளவிலான வாக்காளர்கள் வந்ததால், நண்பகல், 12:00 மணி முதல், 2:00 மணி வரை ஓட்டுப்பதிவு மந்தமாக நடந்தது.

தொடர்ந்து, மாலை, 2:00 மணிக்கு மேல் ஓட்டுப்பதிவு விறுவிறுப்பாக நடந்தது. வெயில் அதிகரித்த காரணத்தினால் மாவட்டத்தில் உள்ள பெரும்பாலான ஓட்டு சாவடி மையங்களில், சாமியான போடப்பட்டு, குடிநீர் வசதி ஏற்படுத்தப்பட்டது. முதலுதவி சிகிச்சைக்கு சுகாதார துறை செவிலியர்கள் பணியில் ஈடுபடுத்தப்பட்டனர்.