அதிகப்படியான சுற்றுலா பயணிகள் வருவதால் ஏற்படும் பிரச்னைகளை தடுக்க, நீலகிரி சுற்றுலா தலங்களுக்கு செல்ல, ஐகோர்ட் உத்தரவின் படி, இ--பாஸ் முறை கடந்த மே மாதம் முதல் நடைமுறையில் உள்ளது. இந்த நடைமுறை, செப்.,30 வரை நீட்டிக்கப்பட்டது. இது, தொடர்பான விசாரணை சென்னை ஐகோர்ட்டில் நேற்று முன்தினம் நடந்தது. அதில், 'இ--பாஸ் நடைமுறை குறித்து மறு உத்தரவு வரும் வரை தொடர வேண்டும்,' என, கோர்ட் உத்தரவிட்டுள்ளது.

அதன்படி, நீலகிரிக்கு வரும் மற்ற மாவட்ட வாகனங்கள் இ - பாஸ் பதிவு செய்து வர வேண்டும். நீலகிரி பதிவெண் கொண்ட வாகனங்களுக்கு இது பொருந்தாது. நீலகிரி மாவட்ட கலெக்டர் லட்சுமி பவ்யா நிருபர்களிடம் கூறுகையில்,''இ - பாஸ் நடைமுறை கடந்த மே மாதம், 7ம் தேதி முதல் நடைமுறையில் உள்ளது. மே மாதம் முதல், செப்., 30 ம் தேதி வரை, 2.77 லட்சம் வாகனங்களுக்கு இ - பாஸ் அனுமதி வழங்கப்பட்டுள்ளது.