நீலகிரி மாவட்டம் ஊட்டி அருகே, இடுஹட்டி கிராமத்தை சேர்ந்தவர் ரவி. இவருடைய மகள் ஷோபனா என்பவருக்கும் கீழ் தொரையட்டி பகுதியை சேர்ந்த பிரபு என்பவருக்கும் கடந்த,2011-ம் ஆண்டு திருமணம் நடந்தது. பிரபுவுக்கும் மஞ்சூர் அருகே, தேனாடு கிராமத்தை சேர்ந்த,வேலன் மனைவி தீனா என்பவருக்கும் கள்ளத்தொடர்பு இருந்துள்ளது. இதனால், பிரபுவுக்கும் ஷோபனாவுக்கும் அடிக்கடி தகராறு ஏற்பட்டது. பிரபு குடும்பத்தினர் ஷோபனாவை தகாத வார்த்தையால் திட்டி மன உளைச்சல் ஏற்படுத்தியுள்ளனர். ஷோபனா கோபித்துக் கொண்டு பெற்றோர் வீட்டுக்கு சென்று விட்டார். இதன் பிறகு குடும்பத்தினர் சமாதானம் பேசி ஷோபனாவை பிரபு வீட்டுக்கு அனுப்பினர். ஆனாலும், பிரபு,- தீனா பழக்கத்தால் குடும்பத்தில் பிரச்னை தொடர்ந்ததால் வெறுப்படைந்த ஷோபனா, கடந்த, 2018 ம் ஆண்டு தூக்குப்போட்டு தற்கொலை செய்து கொண்டார்.

3 ஆண்டு சிறை தண்டனை இதுகுறித்து தேனாடுகம்பை போலீசார் விசாரணை நடத்தி ஷோபனாவின் கணவர் பிரபு, அவருடைய குடும்பத்தினர் மூன்று பேர் மற்றும் தீனா ஆகிய 5 பேர் மீது வழக்கு பதிவு செய்தனர். இந்த வழக்கு விசாரணை ஊட்டி மகிளா கோர்ட்டில் நடந்து வந்தது. இந்த வழக்கில் தற்போது தீர்ப்பு கூறப்பட்டது.

இதன்படி, ஷோபனாவின் கணவர் பிரபு மற்றும் பிரபுவுடன் கள்ளத்தொடர்பில் இருந்த தீனா ஆகிய இரண்டு பேருக்கு தலா, 3 ஆண்டுகள் சிறை தண்டனை, 5 ஆயிரம் ரூபாய் அபராதம் விதித்து நீதிபதி எம்.செந்தில்குமார் உத்தரவிட்டார்.

மேலும், பாதிக்கப்பட்ட பெண்ணின் குடும்பத்தினருக்கு ஒரு லட்சம் ரூபாய் இழப்பீடு வழங்க மாவட்ட நிர்வாகம் நடவடிக்கை எடுக்குமாறும் அறிவுறுத்தினார். இந்த வழக்கில் அரசு தரப்பில் வக்கீல் பி.செந்தில்குமார் ஆஜராகி வாதாடினார்.