இதனால், வன விலங்குகளை பார்த்தால் மட்டுமே மக்கள் மத்தியில் அச்சம் ஏற்படும். இந்நிலையில், இங்கு சமீப காலமாக கொலைகள் அதிகரித்து வருவது மக்கள் மத்தியில் அதிர்ச்சியை ஏற்படுத்தி உள்ளது.

போதையால் நடக்கும் விபரீதங்கள் இங்குள்ள எருமாடு மற்றும் இதன் சுற்றுவட்டார பகுதிகளில், பழங்குடியின மக்கள் அதிக அளவில் குடியிருந்து வரும் நிலையில், கிராமங்களில், சில ஆண்கள் மற்றும் பெண்கள் இணைந்து போதை பழக்கத்திற்கு அடிமையாகி வருகின்றனர். கணவன், மனைவி இருவரும் போதையில் இருக்கும் போது ஏற்படும் தகராறு, கொலை செய்யும் அளவுக்கு மாறிவிடுகிறது.

இப்பகுதியில் கடந்த மார்ச், 21ல் நடந்த தகராறில், கல்யாணி என்பவரை கொலை செய்த, அவரின் கணவர் நாராயணன் கைது செய்யப்பட்டார். ஏப்., மாதம், அம்பிகா என்பவர் கொலை செய்யப்பட்டதில், அவரின் கணவர் மனோஜ் கைது செய்யப்பட்டார்.

இதை தவிர, கணவரை கொலை செய்த சம்பவம் தொடர்பாக, கைது செய்யப்பட்ட மனைவி மீனாட்சி என்பவரும் உயிரிழந்தார்.

இவ்வாறு குடும்ப தகராறில் மூன்று கொலைகள் நடந்துள்ளன. இந்த சூழ்நிலையை மாற்ற, கிராமங்கள் தோறும் போலீசார் விழிப்புணர்வு ஏற்படுத்தி வந்தபோதும், தீர்வு கிடைக்காத நிலை தொடர்கிறது.

புதைக்கப்பட்ட கேரள சடலம் இந்நிலையில், சில மாதங்களுக்கு முன்பு மருமகள், அவரின் சகோதரி ஆகியோர், மாமியாரை குக்கர் மூடியால் தாக்கி கொலை செய்த சம்பவம் பெரும் பரபரப்பை ஏற்படுத்தி உள்ளது. பெண்கள் மத்தியில் இந்த கொலை சம்பவம் பெரும் அதிர்ச்சியை ஏற்படுத்தி உள்ளது. கொலை செய்த பெண்கள் இருவரும் சிறையில் உள்ளனர்.

மேலும், கடந்த மாதம், சேரம்பாடி காபிகாடு பகுதியில், ஓராண்டுக்கு முன்பு, கொலை செய்து புதைக்கப்பட்ட ஒருவரின் சடலத்தை, கேரள போலீசார் மீட்டனர். இது தொடர்பாக, மூன்று பேர் கைதுசெய்யப்பட்டனர்.

இதுபோன்று, பந்தலுார் சுற்றுவட்டார பகுதி சமீப காலமாக, கொலை நகரமாக மாறி வருவது, இளைய தலைமுறையினர் மத்தியிலும், வளரும் குழந்தைகள் மத்தியிலும் பெரும் அதிர்ச்சியை ஏற்படுத்தி உள்ளது.

விழிப்புணர்வு ஏற்படுத்த நடவடிக்கை தொடரும் இதுபோன்ற கொலை சம்பவங்களை தடுப்பதற்கு, மாவட்ட நிர்வாகம், போலீசார் விழிப்புணர்வை ஏற்படுத்த வேண்டிய கட்டாயம் ஏற்பட்டுள்ளது.

எல்லையோரம் புழக்கத்தில் உள்ள போதை பொருட்கள் கடத்தலை முற்றிலுமாக தடை செய்ய நடவடிக்கை எடுக்க வேண்டியதும் அவசர தேவையாக மாறி உள்ளது. தேவாலா டி.எஸ்.பி., ஜெயபால் கூறுகையில்,''பந்தலுார் தாலுகாவில் இது போன்ற துர்சம்பவங்கள் நடக்காமல் தடுக்கும் வகையில், போலீஸ் துறை மூலம் கிராமங்களில் விழிப்புணர்வு நிகழ்ச்சிகள் நடத்தப்பட்டு வருகிறது.

எனினும் தற்போதைய சூழ்நிலைகளை கருத்தில் கொண்டு, இந்த பணிகளை அதிகப்படுத்தி போதை பொருள் பயன்பாடு மற்றும் கொலை சம்பவங்கள் நடப்பதை தடுப்பதற்கான, விழிப்புணர் முகாம்களை அதிகபடுத்த நடவடிக்கை எடுக்கப்படும்,'' என்றார்.