கூடலுார் பழைய பஸ் ஸ்டாண்ட் காந்தி திடலில் அ.தி.மு.க., சார்பில் உண்ணாவிரத போராட்டம் நடந்தது. போராட்டத்திற்கு, கூடலுார் எம்.எல்.ஏ., பொன்ஜெயசீலன் தலைமை வகித்தார்.

போராட்டத்தில், 'டான்டீ தொழிலாளர்களுக்கு நிலுவையில் உள்ள மருத்துவ விடுப்பு; ஈட்டு விடுப்பு தொகை வழங்க வேண்டும். ஐகோர்ட் உத்தரவுப்படி தற்காலிக தொழிலாளர்களை பணி நிரந்தரம் செய்ய வேண்டும்; தகுதி அடிப்படையில் கள மேற்பார்வையாளர்களை நியமிக்க வேண்டும்; தொழிலாளர்களின் வாரிசுகளுக்கு முன்னுரிமை அடிப்படையில் நிர்வாக குழு பணிக்கு தேர்வு செய்ய வேண்டும்; அடிப்படை வசதிகளை செய்து தர வேண்டும்; தனியார் தோட்ட தொழிலாளர்களுக்கு, 20 சதவீதம் போனஸ் வழங்க வேண்டும்; தொழிலாளர்களுக்கு, 10ம் தேதிக்குள் மாத சம்பளம் வழங்க வேண்டும்; வன விலங்குகளிடமிருந்து பாதுகாப்பு வழங்க வேண்டும்; தொழிலாளர்கள் பிரச்னை குறித்து தொழிலாளர் நலத்துறை உரிய நடவடிக்கை எடுக்க வேண்டும்,' என, வலியுறுத்தி கோஷங்கள் எழுப்பினர்.

போராட்டத்தில் அ.தி.மு.க., நிர்வாகிகள் தோட்டத் தொழிலாளர்கள், கூட்டணி கட்சியான பா.ஜ., நிர்வாகிகள் பங்கேற்றனர்.