குன்னுார் தேயிலை ஏல மையத்தில், கடந்த வாரம் நடந்த,17வது ஏலத்தில், '10.46 லட்சம் கிலோ இலை ரகம்; 3.14 லட்சம் கிலோ டஸ்ட் ரகம்,' என, மொத்தம், 13.60 லட்சம் கிலோ ஏலத்திற்கு வந்தது.

அதில், '8.67 லட்சம் கிலோ இலை ரகம்; 2.72 லட்சம் கிலோ டஸ்ட் ரகம்,' என, மொத்தம், 11.39 லட்சம் கிலோ விற்பனையானது. கடந்த ஏலத்தை விட, 2.02 லட்சம் கிலோ வரத்து மற்றும் 2.57 லட்சம் கிலோ விற்பனை குறைந்தது. சராசரி விலை கிலோவிற்கு, 121 ரூபாய் என இருந்தது. மொத்த வருமானம், 13.78 கோடி ரூபாய் கிடைத்தது. ஒரே வாரத்தில், 3.32 கோடி ரூபாய் மொத்த வருவாய் குறைந்தது.

'டீசர்வ்' ஏலம்

நீலகிரி, கூட்டுறவு தொழிற்சாலைகளில் உற்பத்தி செய்யும் தேயிலை துாள் 'டீசர்வ்' மையத்தில் ஏலம் விடப்படும் நிலையில், 17வது ஏலத்திற்கு, 1.57 லட்சம் கிலோ வந்ததில், 1.39 லட்சம் கிலோ விற்பனையானது. சராசரி விலை கிலோவிற்கு, 109.56 ரூபாய் என இருந்தது. 1.53 கோடி ரூபாய் மொத்த வருமானம் கிடைத்தது. இரு ஏல மையங்களில் சேர்த்து, 15.31 கோடி ரூபாய் மொத்த வருமானம் கிடைத்தது.

கோவை ஏல மையத்தில், இந்த ஏலத்தில், 4.27 லட்சம் கிலோ வந்ததில், 3.29 லட்சம் கிலோ என 77.09 சதவீதம் விற்பனையானது. சராசரி விலை ரூ. 140.14 என இருந்தது; 4.61 கோடி ரூபாய் மொத்த வருமானம் கிடைத்தது.

கேரளா கொச்சி ஏல மையத்தில், 17வது ஏலத்தில் வரத்து விற்பனை அதிகரித்தது. 10.35 லட்சம் கிலோ வந்ததில், 9.50 லட்சம் கிலோ விற்பனையானது. சராசரி விலை, 166.30 ரூபாய் என இருந்தது. 15.79 கோடி ரூபாய் மொத்த வருமானம் கிடைத்தது. தென் மாநிலங்களில், 4 ஏல மையங்களில் நடந்த தேயிலை ஏலங்களில், 35.71 கோடி ரூபாய் மொத்த வருமானம் கிடைத்தது.

தென் மாநில அளவில், கொச்சி ஏல மையத்தில் கடந்த ஏலம் ரத்து செய்யப்பட்ட நிலையில், இந்த ஏலத்தில் வரத்து, விற்பனை உயர்ந்து, 12.25 கோடி ரூபாய் வருவாய் அதிகமாக இருந்தது.