ஊட்டி நகரில் மக்கள் அதிகமாக கூடும் மார்க்கெட், உழவர் சந்தை, பஸ் நிலையம் மற்றும் சுற்றுலா மையங்களில் இருசக்கர வாகனத்தில் பெண் காவலர்கள் ரோந்து சென்று அவர்களுக்கு வழங்கப்பட்டுள்ள ஒலி பெருக்கி வாயிலாக விழிப்புணர்வு ஏற்படுத்த உள்ளனர்.

ஊட்டி நகரத்தில், 3; ஊரக பகுதியில், 2; குன்னுாரில் 2; கோத்தகிரியில், 1; கூடலுாரில், 2 வாகனங்கள் அறிமுகப்படுத்தப்பட்டுள்ளது. இதனை துவக்கி வைத்து, கோவை மண்டல ஐ.ஜி., செந்தில்குமார் நிருபர்களிடம் கூறுகையில், ''இந்த வாகனங்களில் செல்லும் பெண் காவலர்கள் பள்ளி தொடங்கும் போதும், முடியும் போதும், அந்தந்த பகுதிகளுக்கு சென்று கண்காணிப்பு பணியில் ஈடுபடுவர்.

காலை, 8:00 மணி முதல், 11:00 மணி வரையிலும்; மாலை, 3:00 மணி முதல், 7:00 மணி வரையிலும் ரோந்து பணியில் ஈடுபடுவர். இந்த ரோந்து வாகனம் வாயிலாக, பெண்கள் மற்றும் குழந்தைகளுக்கு பாதுகாப்பான சூழல் உருவாகும்,'' என்றார். எஸ்.பி.,நிஷா உட்பட பலர் பங்கேற்றனர்.