பெரம்பலுார் மாவட்டம், ஆலத்துார் தாலுகா கூடலுார்- - கூத்துார் கிராமங்களுக்கு இடையே மருதையாறு ஓடுகிறது. இதனால், கூடலுார் பகுதி மக்கள் தங்களது அவசிய தேவைகளுக்கு ஆற்றைக் கடந்தே செல்ல வேண்டும்.

மேலும், நுாற்று-க்கும் மேற்பட்ட மாணவ- - மாணவியர் ஒருவரை ஒருவர் கைகோர்த்து பிடித்தபடி, ஆற்றைக் கடந்துதான் கூத்துார் அரசு மேல்நிலைப் பள்ளிகளுக்கு சென்று வருகின்றனர்.

இதனால், பலரும் மாற்று உடையுடன் பள்ளிக்கு சென்று வருகின்றனர். தண்ணீர் இல்லாத போது, மக்கள் நடந்தும், டூ--வீலர்களிலும் ஆற்றுப்படுகையைக் கடந்தும் செல்கின்றனர்.

ஆனால், ஆற்றில் தண்ணீர் அதிகமாக செல்லும்போது இலுப்பைக்குடி, பிலிமிசை வழியாக கூத்துாருக்கு, 7 கி.மீ., கடந்து செல்ல வேண்டிய அவல நிலை உள்ளது.

இப்பிரச்னைக்கு நிரந்தர தீர்வு காண, மருதையாற்றின் குறுக்கே மேம்பாலம் கட்ட வேண்டும் என, இப்பகுதி மக்கள் வலியுறுத்தி வருகின்றனர். ஆனால், இதுவரை எந்தவித நடவடிக்கையும் எடுக்கவில்லை என்பது சோகத்தை அதிகரிக்கிறது.