சென்னையை சேர்ந்தவர் பெரியார் செல்வம். இவரது மகன் புவி ஆற்றல், 12. இவர், சென்னை அகாடமியில் நீச்சல் பயிற்சி பெற்று, 2024ல் கோவாவில் நடந்த பாரா ஒலிம்பிக் போட்டியில், 3 பிரிவில் தங்கம், வெள்ளி பதக்கம் வென்றார்.

தொடர்ந்து நீச்சல் பயிற்சி பெற்ற சிறுவன், சவாலான பாக் ஜலசந்தி கடலில் நீந்தி சாதிக்க முடிவு செய்தார். அதன்படி, நேற்று முன்தினம், சிறுவன் ராமேஸ்வரத்தில் இருந்து படகில் இலங்கை சென்றார்.

நேற்று அதிகாலை, 2:45 மணிக்கு இலங்கை தலைமன்னார் கடலில் குதித்து நீந்த துவங்கினார். அவ்வப்போது, சிறிது நேர ஓய்வுக்கு பின், தொடர்ந்து நீந்திய சிறுவன், நேற்று மதியம், 12:00 மணிக்கு தனுஷ்கோடி அரிச்சல்முனை கடற்கரைக்கு வந்தார்.

மொத்தம், 28 கி.மீ., துாரத்தை, 9 மணி 15 நிமிடத்தில் நீந்தி கடந்து சாதனை படைத்தார். சிறுவனை உறவினர்கள், இந்திய, இலங்கை நீச்சல் வீரர்கள் வழிகாட்டு குழு ஒருங்கிணைப்பாளர் ரோஜர் வரவேற்றனர்.