டாஸ்மாக் கடைகளில், காலி மது பாட்டில்களை, பணியாளர்கள் திரும்ப பெற வேண்டும் என, டாஸ்மாக் நிர்வாகம் வலியுறுத்தி வருகிறது.

இதற்கு, அனைத்து தொழிற்சங்கங்களும் பல வகைகளில் மறுப்பு தெரிவித்து வருகின்றன. இருப்பினும், டாஸ்மாக் நிர்வாகம், தொழிற்சங்க நிர்வாகிகளை சமாதானம் செய்ய முயற்சி செய்தனர்.

இந்நிலையில், காலி மது பாட்டில்களை திரும்ப பெறும் பணிக்கு எதிர்ப்பு தெரிவித்து,- டாஸ்மாக் பணியாளர்கள், டிச., 3-ம் தேதி வேலை நிறுத்தப் போராட்டம் அறிவித்துஉள்ளனர்.

தமிழ்நாடு அரசு டாஸ்மாக் தொழிற்சங்கங்களின் பேரமைப்பு மாநில அமைப்பாளர் பாலகிருஷ்ணன் திருச்சியில் நேற்று கூறியதாவது:

மது பிரியர்கள், காலி பாட்டில்களை பொது இடங்களில் வீசி செல்வதால் சுற்றுச்சூழல், விவசாய நிலங்கள் பாதிக்கப்படுகின்றன.

இந்த பாதிப்புகளை தடுப்பதற்காக, காலி மது பாட்டில்களை திரும்ப பெறும் திட்டத்தை டாஸ்மாக் நிர்வாகம் செயல்படுத்தி வருகிறது. காலி பாட்டில்களை சேகரிக்க, தனி ஒரு முகமை அமைக்க வேண்டும் என்பது தான் எங்கள் நிலைப்பாடு.

நிர்வாக தேவை கருதி ஸ்கேனிங், டிஜிட்டல் பண பரிவர்த்தனை உட்பட பல்வேறு வேலைகளால், ஏற்கனவே டாஸ்மாக் பணியாளர்களுக்கு பணிச்சுமை அதிகரித்துள்ளது.

எனவே, காலி பாட்டில்களை திரும்ப பெற, டாஸ்மாக் பணியாளர்களை வலியுறுத்துவதற்கு எதிர்ப்பு தெரிவித்து, தமிழ்நாடு அரசு டாஸ்மாக் பணியாளர் சங்கம் மற்றும் எட்டு அமைப்புகள் இணைந்து, டிச., -3ம் தேதி, தமிழகம் முழுதும் ஒரு நாள் வேலை நிறுத்தப் போராட்டம் நடத்த முடிவு செய்யப்பட்டுள்ளது.

இவ்வாறு அவர் கூறினார்

- நமது நிருபர் -:.