அரசின் இலவச லேப்-டாப் கிடைக்குமென்ற எதிர்பார்ப்பால், வெளி மார்க்கெட்டில், லேப்-டாப் விற்பனை, 60 சதம் குறைந்துள்ளது.தேர்தலில் வெற்றிபெற்று ஆட்சியைப் பிடித்த அ.தி.மு.க., தேர்தல் வாக்குறுதிகளை நிறைவேற்றத் துவங்கியுள்ளது. இலவச அரிசி, தாலிக்கு தங்கம் போன்ற திட்டங்களை தொடர்ந்து, 25 லட்சம் குடும்பங்கள் பயன்பெறும் வகையில் கிரைண்டர், மிக்ஸி, ஃபேன் கொள்முதலுக்கு டெண்டர் கோரும் பணி நடந்து வருகிறது.'ஆடு, மாடு, கிரைண்டர், மிக்ஸி, ஃபேன், மாணவ, மாணவியருக்கு லேப்-டாப் ஆகியவை வழங்கும் பணி செப்டம்பர் 15ம் தேதி துவங்கும்' என, முதல்வர் ஜெயலலிதா அறிவித்துள்ளார். எப்படியும் கடந்த ஆட்சி போல ரேஷன்கார்டு வைத்துள்ள அனைவருக்கும் இலவசங்கள் வந்து சேருமென பொதுமக்கள் எதிர்பார்க்கின்றனர். இதன் காரணமாக அரசு இலவசமாக வழங்குவதாக அறிவித்துள்ள பொருட்களின் விற்பனை பெரிதும் மந்தமாகியுள்ளது.சராசரியாக மாதம், 60 மிக்ஸி, கிரைண்டர் விற்பனையான கடையில், தற்போது, 12 கூட விற்பனையாவதில்லை என, வியாபாரிகள் புலம்புகின்றனர். இலவசத் திட்டம் விநியோகம் துவங்கி விட்டால், விற்பனை முழுமையாக பாதிக்கப்படுமென அஞ்சுகின்றனர்.