அனைத்திந்திய அஞ்சல் ஊழியர் சங்க மாநாடு

ஆத்துார்: ஆத்துார் தலைமை தபால் நிலைய அலுவலகத்தில், நேற்று அனைத்திந்திய அஞ்சல் ஊழியர் சங்க 26வது கிளை மாநாடு மற்றும் புதிய நிர்வாகிகள் தேர்வு நடந்தது.

முன்னாள் அகில இந்திய துணை பொதுச் செயலர் அமிர்தலிங்கம் தலைமை வகித்தார். இதில், காலியாக உள்ள பதவிகளுக்கு வெளியாட்களை கொண்டு நிரப்பக்கூடாது. பணி மூப்பு அடிப்படையில் பணி நிரப்ப வேண்டும். தபால்காரர்களுக்கு ஓட்டுனர் உரிமம் இல்லை என்று மாதம், 2,500 ரூபாய் பிடித்தம் செய்வதை நிறுத்த வேண்டும் உள்ளிட்ட தீர்மானங்களை நிறைவேற்றினர்.

புதிய நிர்வாகிகளாக தலைவர் வேலு, செயலர் பாலமுருகன், நிதி செயலர் செந்தில்குமார் ஆகியோர் தேர்வு செய்யப்பட்டனர். இதில், முன்னாள் மாநில உதவி தலைவர் லோகநாதன், கோட்ட தலைவர் பெருமாள், கோட்ட செயலர் செல்வம், நிர்வாகிகள் மாதேஸ்வரன், துரைபாண்டியன், கனகராஜ் உள்பட பலர் கலந்து கொண்டனர்.