லோக்சபா தொகுதியில் ஆண்கள், 8,23,336; பெண்கள், 8,25,354; திருநங்கை, 221 பேர் என, 16,48,911 பேர் உள்ளனர். வாக்காளர் ஓட்டுப்போட வசதியாக, 1,249 மையங்களில், 3,257 ஓட்டுச்சாவடிகள் அமைக்கப்பட்டுள்ளன. அதில், 264 பதற்றமானவை. தேர்தல் நடத்தை விதிகளை கண்காணித்து, மீறுவோர் மீது தக்க நடவடிக்கை எடுக்க, 33 பறக்கும்படை, 33 நிலை கண்காணிப்பு குழு, 11 வீடியோ பார்வை குழு, 11 வீடியோ கண்காணிப்பு குழு, 3 ஊடக சான்று கண்காணிப்பு குழு, 11 கணக்கு சரிபார்ப்பு குழு, தினசரி அறிக்கை தாக்கல் செய்ய ஒரு குழு என, 7 வகை குழுக்கள் 24 மணி நேரமும் செயல்படும்.

தேர்தல் பணியில், 15,000 அரசு ஊழியர்கள் ஈடுபடுகின்றனர். 50 ஆயிரம் ரூபாய்க்கு மேல் பணம் எடுத்துச்செல்ல உரிய ஆவணம்; ரசீது கண்டிப்பாக தேவை. குறிப்பாக வெள்ளி பொருள் கொண்டு செல்ல, 'டெலிவரி சலான்' வேண்டும். அதன் மதிப்பு, 2 லட்சம் ரூபாய்க்கு மேல் இருந்தால், 'இ-வே' ரசீது மிக முக்கியம்.

அரசுக்கு சொந்தமான இடத்தில் உள்ள அனைத்து சுவர் எழுத்து, சுவரொட்டிகள், காகிதங்கள், விளம்பர பலகை, பதாகைகள், கொடிகள் ஆகியன தேர்தல் அறிவிப்பு வெளியான, 24 மணி நேரத்துக்குள் அகற்றப்பட வேண்டும் என்பதால் அதற்கான பணிகள் முழுவீச்சில் நடந்து வருகிறது. நடத்தை விதிகள் மீறல் தொடர்பான புகார்களை தெரிவிக்க, கலெக்டர் அலுவலகத்தில், 24 மணி நேரம் இயங்கும் தேர்தல் கட்டுப்பாடு அறை திறக்கப்பட்டுள்ளது.

1800 - 425 - 7020 என்ற கட்டணமில்லா எண், 0427 - 2450031, 2450032, 2450035, 2450046 ஆகிய தொலைபேசி எண்கள், 94899-39699 என்ற எண்ணுக்கு வாட்ஸாப் செயலி மூலமும் தெரிவிக்கலாம். தவிர, e-- Vigil என்ற செயலி மூலமும் புகார் தெரிவிக்கலாம். அதன் மீது, 100 நிமிடத்தில் நடவடிக்கை எடுத்து தீர்வு காணப்படும். இவ்வாறு அவர் கூறினார்.