பா.ம.க., தலைவர் அன்புமணி, சேலம் மாவட்டம் மேச்சேரி அடுத்த மல்லிகுந்தத்தில், அக்கட்சி நிர்வாகி இல்ல திருமண விழாவில் பங்கேற்க நேற்று வந்தார். முன்னதாக அவருக்கு மேச்சேரி ஒன்றிய எல்லையான தொப்பூரில், மதியம், 2:00 மணிக்கு, மேட்டூர் எம்.எல்.ஏ., சதாசிவம் உள்ளிட்ட நிர்வாகிகள் வரவேற்பு அளித்தனர்.

தொடர்ந்து அன்புமணி பேசியதாவது:

தொப்பூர் கணவாய் சாலையில் விபத்தை தவிர்க்க, பாலம் அமைக்க, 1,050 கோடி ரூபாய் ஒதுக்கீடு செய்யப்பட்டுள்ளது. இத்திட்டத்துக்கு நிதி ஒதுக்கிய மத்திய நெடுஞ்சாலைத்துறை அமைச்சர் நிதின் கட்கரி, 'நிதி ஒதுக்கீடு செய்தது சந்தோஷம்தானே' என, என்னிடம் கேட்டார். அவரிடம், சேலம் -உளுந்துார்பேட்டை, புதுச்சேரி - கிருஷ்ணகிரி சாலையை, 4 வழிச்சாலையாக மாற்றவும், சேலத்தில் புறவழிச்சாலை அமைக்கவும் கோரிக்கை விடுத்துள்ளேன். அதற்கும் நடவடிக்கை எடுப்பதாக உறுதி அளித்துள்ளார். மேட்டூர் அணையில் இருந்து கடலில் கலந்து வீணாகும் நீரில், 5 டி.எம்.சி.,யை சரபங்கா ஆற்றில் கொண்டு சேர்த்தால், அந்த நீர் திருமணிமுத்தாறு, ஆத்துாரில் உள்ள வசிஷ்ட நதி வழியே கடலுார் வரை செல்லும். சேலத்தில் பனமரத்துப்பட்டி ஏரியில், 1 டி.எம்.சி., நீரை சேமிக்க முடியும். அதில் ஆக்கிரமிப்புகளை அகற்றுவதாக கூறி, 106 கோடி ரூபாய் ஒதுக்கீடு செய்து வீணடித்து விட்டனர். தி.மு.க., ஆட்சி, முடிவுக்கு வர இன்னும், 4 மாதங்கள் மட்டும் உள்ளது. நீங்கள் எதிர்பார்த்த கூட்டணியை விரைவில், பா.ம.க., அமைக்கும்.

இவ்வாறு அவர் பேசினார்.

வன்னியர் சங்க மாநில தலைவர் கார்த்தி, மாவட்ட தலைவர் மாணிக்கம், தர்மபுரி எம்.எல்.ஏ., வெங்கடேசன் உள்ளிட்ட நிர்வாகிகள் உடனிருந்தனர்.