கோல்டு வின்னர் அங்கீகாரம் வழங்கல்

சேலம், ஜன. 1-

விநாயகா மிஷன் பல்கலைக்கழகத்திற்கு உட்பட்ட, சேலம் விம்ஸ் மருத்துவமனை வளாகம், புதுச்சேரி ஆறுபடை வீடு மருத்துவக் கல்லுாரி மற்றும் மருத்துவமனை வளாகம், சென்னை ஆறுபடை வீடு தொழில்நுட்பக் கல்லுாரி வளாகம் ஆகியவற்றில் அமைந்துள்ள, அலைடு ஹெல்த் சயின்ஸ் துறைக்கு இந்திய தொழில் கூட்டமைப்பு மூலம், கோல்டு வின்னர் என்ற அங்கீகாரம் வழங்கப்பட்டுள்ளது.

இது குறித்து துறையின் டீன் பேராசிரியர் டாக்டர் செந்தில்குமார் கூறியதாவது: இந்திய தொழில் கூட்டமைப்பு என்பது, ஒரு அரசு சாரா வணிகம், தொழில் நிறுவனமாகும். இந்நிறுவனம் சிறந்த பணியாற்றி வரும் கல்வி நிறுவனங்கள், தொழில்துறைகள் மற்றும் தனி நபர்களை அங்கீகரிக்கும் விதமாக விருதுகளை வழங்கி வருகிறது.

இதன்படி, எங்கள் கல்லூரியின் தொழில்துறை மற்றும் கல்வியியல் சார்ந்த நடவடிக்கைகளை மையமாக கொண்டு, குறிப்பாக தொழில் துறையின் தேவையை பூர்த்தி செய்யும் வகையில், மாணவர்களின் திறனை மேம்படுத்துவதற்காக மேற்கொள்ளப்பட்டு வரும் நடவடிக்கைகள், பயிற்சி, புரிந்துணர்வு ஒப்பந்தங்கள், தொழில்துறை சார்ந்த ஆராய்ச்சி மற்றும் இதனை மேம்படுத்துவதற்கான புதுமை தொழிற்கல்வி ஆகியவற்றை ஆராய்ந்து, தனியார் கல்வி நிறுவனங்களுக்கான பிரிவில் தொழில்துறை கல்வியல் சார்ந்த விருதுகளின் அடிப்படையில், கோல்டு வின்னர் என்ற அங்கீகாரம் வழங்கப்பட்டு சிறப்பிக்கப்பட்டுள்ளது,

இவ்வாறு கூறினார்.

விருது பெறுவதற்கு சிறந்த பங்களிப்பாற்றிய துறையின் டீனை, பல்கலையின் வேந்தர் டாக்டர் கணேசன், துணைவேந்தர் டாக்டர் அனுராதா கணேசன் மற்றும் துறை பேராசிரியர்கள் வாழ்த்தி பாராட்டினர்.