சேலம், தாசநாயக்கன்பட்டி, சவுடாம்பிகா நகரை சேர்ந்தவர் ஆனந்த். இவர், சேலம் நுகர்வோர் குறைதீர் ஆணையத்தில் வழக்கு தொடுத்தார். அதில் கூறியிருப்பதாவது: சேலம் ஜங்ஷன் பிரதான சாலையில் இயங்கும், 'தரண் ஹோம்ஸ் கன்ஸ்ட்ரக்ஷன் பிரைவேட் லிமிடெட்' நிறுவனம் சார்பில், மல்லுார், தேங்கல்பாளையத்தில், 33 லட்சம் ரூபாயில், 2,400 சதுரடியில் வீடு கட்டி தரப்படும் என விளம்பரப்படுத்தப்பட்டது. அதை நம்பி, 2023, ஜூலையில், 3 லட்சம் ரூபாய், 'அட்வான்ஸ்' கொடுத்தேன். ஒப்பந்த காலத்தில் வீடு கட்டி ஒப்படைக்காததால், 'அட்வான்ஸ்' தொகையை திரும்ப கேட்டேன்.

அதற்கு நிலம் கொடுப்பதாக கூறி அலைக்கழித்து ஏமாற்றிவிட்டனர்.இவ்வாறு அதில் கூறப்பட்டிருந்தது.வழக்கை விசாரித்த நுகர்வோர் குறைதீர் ஆணையம் தீர்ப்பு வழங்கியது. அதில், 'நுகர்வோர் வழங்கிய, 3 லட்சம் ரூபாய் அட்வான்ஸ் தொகையுடன், முறையற்ற வணிக நடவடிக்கைக்கு இழப்பீடாக, 1.50 லட்சம், சேவை குறைபாட்டுக்கு, 1 லட்சம், மன உளைச்சலுக்கு, 50,000, வழக்கு செலவு, 10,000 என, 6.10 லட்சம் ரூபாயை, வட்டியுடன் சேர்த்து வழங்க வேண்டும்' என கூறப்பட்டுள்ளது.