சேலம் மாவட்டம் ஓமலுார் அருகே பாகல்பட்டியில் ஹிந்து சமய அறநிலையத்துறை கட்டுப்பாட்டில் சென்றாய பெருமாள் கோவில் உள்ளது. அங்கு ரத சப்தமி உற்சவ விழாவையொட்டி, உற்சவர் சுவாமி சிலைகளை வைத்து திருவீதி உலா நடக்கும். பின் அச்சிலைகள், சேலம் சுகவனேஸ்வரர் கோவிலில் உள்ள உலோக சிலைகள் பாதுகாப்பு மையத்தில் வைக்கப்படும்.

இதனால் அக்கோவில் அர்ச்சகர்கள், ஊர்மக்கள் நேற்று, உற்சவர் சென்றாய பெருமாள், துளசியம்மாள், லட்சுமி அம்மன் சுவாமி சிலைகளை வாங்க, சுகவனேஸ்வரர் கோவிலில் உள்ள உதவி கமிஷனர் அலுவலகத்துக்கு வந்தனர். அப்போது அங்கிருந்த அதிகாரிகள், சிலைகளை வழங்க மறுத்துள்ளனர். இதனால் மக்கள், அந்த அலுவலகத்தை முற்றுகையிட்டு வாக்குவாதம் செய்தனர். ஒருவழியாக, காலை, 10:00 மணிக்கு வந்த மக்கள், மாலை, 4:30 மணிக்கு சிலைகளை வாங்கிச்சென்றனர். இரவு சுவாமி ஊர்வலம் முடிந்ததும், இன்று காலை மீண்டும் சுவாமி சிலைகள், அறநிலையத்துறை அதிகாரிகளிடம் ஒப்படைக்கப்படும்.

இதுகுறித்து மக்கள் கூறுகையில், 'அர்ச்சகர் தான் கையெழுத்திட்டு வாங்கி வருவார். ஆனால், கோவில் அறங்காவலரின் தீர்மான நகல் வேண்டும் என அதிகாரிகள் தெரிவித்தனர். அறங்காவலர் பண மோசடி செய்துள்ளதாக புகார் கூறியுள்ளோம். இதுதொடர்பாக விசாரணை நடந்து வருகிறது' என்றனர்.

அதிகாரிகள் கூறுகையில், 'அறங்காவலரின் தீர்மானம் பெற்று தான் சிலைகளை வழங்க வேண்டும். இரு தரப்பினர் இடையே உள்ள பிரச்னையால் தீர்மான நகல் வழங்காமல் இருந்ததால் சிலைகள் வழங்க மறுக்கப்பட்டது. பின் தீர்மானம் பெற்று இணை கமிஷனரிடம் கையெழுத்து பெற்று சிலைகள் வழங்கப்பட்டன' என்றனர்.